«تۇل» فيلمى «ەۋرازيا» كينوفەستيۆالىندە سەنساتسيا جاسادى

الماتى. قازاقپارات - XVII حالىقارالىق «ەۋرازيا» كينوفەستيۆالىندە قازاقستاندىق «تۇل» فيلمنىڭ تۇساۋى كەسىلدى.

كينوگەرلەردىڭ سوزىنشە، ناعىز كينەماتوگرافيالىق شەديەۆر كوپتى قاجەت ەتپەيدى. وعان دالەل 12 كۇندە، شاعىن عانا قارجىعا تۇسىرىلگەن ءشاريپا ورازبايەۆانىڭ «تۇل» فيلمى. ينتەرناتتا وسكەن قىزدىڭ ءومىرى باياندالاتىن كارتينا «ەۋرازيا» حالىقارالىق كينوفەستيۆالىنىڭ سەنساتسياسىنا اينالدى.

«فيلمنىڭ بيۋدجەتى شاعىن عانا بولدى. اكتەرلەر كينوعا تەگىن تۇسۋگە كەلىستى دەسەك تە بولادى. ولاردىڭ اۆتورلىق كينوعا قولداۋ كورسەتكەنى ماڭىزدى. ءوز العىسىمدى بىلدىرەمىن»، - دەدى فيلمنىڭ رەجيسسەرى ءشاريپا ورازبايەۆا.

فيلمدە باياندالعان وقيعا ءشاريپانىڭ جاقىن قۇربىسىنىڭ ومىرىنە نەگىزدەلگەن. بۇل تەك كينو عانا ەمەس، رۋحتىڭ شىنايى دراماسى. كارتينادا جالعىز قالىپ، ينتەرناتتا وسكەن قىزدىڭ قيىندىققا تولى ءومىرى كورسەتىلەدى.

«قۇربىم تاعدىردىڭ ءتۇرلى سىناقتارىن باستان كەشكەن. وسىدان سوڭ ول كۇردەلى پسيحولوگيالىق قيىندىقتارعا تاپ بولدى. قازىر ول ۇنەمى ءوزىن قۇبىجىق رەتىندە ەلەستەتەدى. فيلمنىڭ سوڭىندا ءدال وسى ءساتتى كورسەتۋگە تىرىستىم. سەبەبى ءبىز ءوزىمىزدى قۇبىجىققا اينالدىرامىز»، - دەيدى ورازبايەۆا.

فيلمدە قاڭتار وقيعاسىنىڭ كادرلارى دا كورسەتىلدى.

«قاڭتار وقيعاسى بارلىعىمىز ءۇشىن اۋىر جانە قايعىلى تاقىرىپ. فيلمدە ونى كورسەتۋ ارقىلى بىزگە نەنىڭ ماڭىزدى ەكەنىن ايتقىم كەلدى»، - دەيدى قازاقستاندىق رەجيسسەر.

ءشاريپا ورازبايەۆانىڭ ايتۋىنشا، قازاق تىلىندە بۇل ءسوز تەك جەتىم دەگەندى عانا بىلدىرمەيدى.

«تۇل» فيلمى تەك جەتىم قىز تۋرالى ەمەس. بۇل ادامنىڭ ىشكى جان دۇنيەسىندەگى ارپالىس. مەن وسى سەزىمدى بەرۋگە تىرىستىم»، - دەيدى رەجيسسەر.

كورەرمەندەر كورسەتىلىمنەن كەيىن رەجيسسەر مەن اكتەرلەردەن وزدەرىن مازالاعان سۇراقتاردىڭ جاۋابىن الدى.

ەسكە سالايىق، الماتىدا حالىقارالىق «ەۋرازيا» كينوفەستيۆالى ءوتىپ جاتىر.