قازاقستاندا كوروناۆيرۋسقا قاتىستى سۇراقتارعا جاۋاپ بەرەتىن Telegram-بوت ىسكە قوسىلدى
نۇر-سۇلتان. قازاقپارات – ق ر د س م قوعامدىق دەنساۋلىق ساقتاۋ ۇلتتىق ورتالىعى كوروناۆيرۋستىق ينفەكسيا ماسەلەلەرى بويىنشا Telegram-بوتتى ىسكە قوستى، دەپ حابارلايدى قازاقپارات.
قوعامدىق دەنساۋلىق ساقتاۋ ۇلتتىق ورتالىعى (ق د س ۇ و) ىسكە قوسقان Telegram-بوتتىڭ كومەگىمەن پايدالانۋشىلار COVID-2019 كوروناۆيرۋستىق ينفەكسياسى بويىنشا سۇراقتارعا جاۋاپ الا الادى.
«بۇل بوتتى ىسكە قوسۋدىڭ ماقساتى - ەل ازاماتتارىنىڭ كوروناۆيرۋس جونىندەگى سۇراققا جاۋاپ الۋ ءراسىمىن جەڭىلدەتۋ. اقپارات الۋ ءۇشىن چاتتاعى «ستارت» باتىرماسىن باسۋ كەرەك. اقپارات سۇراۋ ءۇشىن پايدالانۋشى چاتتىڭ ءتيىستى تۇيمەلەرىن باسۋ ارقىلى پارمەندەردى جىبەرۋ كەرەك. بۇدان ءارى پايدالانۋشى جاۋاپتاردى كورە الادى. ونىڭ قىزمەتتەرىن پايدالانۋ ءۇشىن Telegram-عا تىركەلگەن پايدالانۋشى بولۋ كەرەك» دەلىنگەن حابارلامادا.
«كوروناۆيرۋس- شۇعىل جەلى» Telegram-بوتى كوروناۆيرۋستىق ينفەكسيا تۋرالى نەگىزگى اقپاراتتى (كوروناۆيرۋس دەگەنىمىز نە، بەرىلۋ جولدارى، سيمپتومدارى، ينكۋباتسيالىق كەزەڭى، جۇقتىرىپ الۋدان قالاي قورعانۋ كەرەك، كارانتينگە كىم الىنادى جانە ت. ب. ) قامتيدى.
بوت ەكى تىلدە: قازاق جانە ورىس تىلدەرىندە قولجەتىمدى. سونىمەن قاتار، كوروناۆيرۋس ماسەلەلەرى بويىنشا ق د س ۇ و بازاسىندا تاۋلىك بويى call - ورتالىق (1406) جۇمىس ىستەيدى، تەل. 87172768043.
