تۇڭعىش قازاق عارىشقا ۇشقانىنا 33 جىل
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ 33 جىل بۇرىن ءدال وسى كۇنى عارىشقا ۇشقان تۇڭعىش قازاق توقتار اۋباكىروۆتى ايتۋلى كۇنمەن قۇتتىقتادى.
مينيسترلىك وسىدان 33 جىل بۇرىن، 1991-جىلعى 2-قازاندا قازاقستان تاريحىندا عارىشقا العاش قادام جاسالعانىن اتاپ ءوتتى. عارىشكەر توقتار اۋباكىروۆ بايقوڭىر عارىش ايلاعىنان «سويۋز ت م-13» عارىش كەمەسىندە ۇشتى. ەكيپاج قۇرامىندا ول «مير» وربيتالىق ستانتسياسىندا ءبىر اپتا بولدى جانە 10-قازاندا جەرگە ورالدى. وسى ۋاقىت ارالىعىندا ول بەس عىلىمي ەكسپەريمەنت جۇرگىزدى.
«توقتار اۋباكىروۆتىڭ ۇشۋى قازاقستاندىق عارىش عىلىمى مەن تەحنولوگيالارىن دامىتۋدىڭ شەشۋشى ءساتى بولدى. قازاق ۇلتىنىڭ تۇڭعىش عارىشكەرى رەتىندە ونىڭ جەتىستىكتەرى جەردى عارىشتان زەرتتەۋدە جانە قازاقستاندا عارىش تەحنولوگيالارىن ازىرلەۋدە جاڭا ءداۋىردىڭ باستالۋىن بىلدىرەدى»، - دەپ اتاپ ءوتتى سيفرلىق دامۋ مينيسترلىگى.
عارىشتا ارال تەڭىزىنىڭ قۇمدى داۋىلدارىن ءتۇسىرۋ جانە مەديتسينالىق-بيولوگيالىق زەرتتەۋلەر جۇرگىزىلدى. ارنايى ازىق-تۇلىك جانە عارىشتىق بيوتەحنولوگيا مۇقيات باقىلاۋدان ءوتتى. ميكروگراۆيتاتسياداعى مەتال بالقىمالارىنىڭ ارەكەتى زەرتتەلدى. جەرگە ورالعان سوڭ، جينالعان بارلىق ۇلگىلەر عالىمدار تاراپىنان مۇقيات زەرتتەدى.
ايتا كەتەيىك، اۋباكىروۆ توقتار وڭعارباي ۇلى - تەحنيكا عىلىمدارىنىڭ دوكتورى، پروفەسسور، ك س ر و- نىڭ 72- عارىشكەرى، ك س ر و- نىڭ ەڭبەك سىڭىرگەن سىناۋشى ۇشقىشى، قازاقستان رەسپۋبليكاسىنىڭ ەڭبەك سىڭىرگەن سپورت شەبەرى. قازاقستان اۋە كۇشتەرىنىڭ گەنەرال-مايورى. قازاقستاننىڭ حالىق قاھارمانى، كەڭەس وداعىنىڭ باتىرى.
