تايسون مەيۆەزەرمەن جەكپە-جەگىنىڭ قايدا جانە قاشان وتەتىنىن جاريالادى
استانا. KAZINFORM - اۋىر سالماقتاعى بۇرىنعى الەم چەمپيونى مايك تايسون فلويد مەيۆەزەرمەن بولاتىن جەكپە-جەگى كەلەسى جىلدىڭ ناۋرىز ايىندا افريكادا وتەتىنىن راستادى، دەپ حابارلايدى Kazinform.
تانىمال بوكسشىلار اراسىنداعى جەكپە-جەك تۋرالى قىركۇيەك ايىندا جاريالانعان بولاتىن. ءبىراق كەزدەسۋدىڭ ءوتۋ-وتپەۋى اسىرەسە مەيۆەزەر 2026-جىلى مەنني پاكياومەن ريەۆانش وتكىزۋدى قاراستىرىپ جاتقانى تۋرالى حابارلامالارعا بايلانىستى بىرنەشە اي بويى بەلگىسىز بولدى. دەگەنمەن، دۋبليندە بەرگەن سۇحباتىندا تايسون جەكپە-جەككە ارنالعان سوڭعى جوسپارلارى تۋرالى باياندادى.
- ول ناۋرىز ايىندا افريكادا وتەدى. بۇل كەرەمەت جەكپە-جەك بولادى، ول بارلىق رەكوردتاردى جاڭارتادى جانە سپورت تاريحىنداعى ەڭ ءىرى وقيعالاردىڭ بىرىنە اينالادى، - دەپ مالىمدەدى ول.
تايسون جەكپە-جەكتىڭ وتپەي قالۋى مۇمكىن دەگەن قاۋەسەتتەرگە قاراماستان كورمەلىك جەكپە-جەككە دايىندىق جالعاسىپ جاتقانىن، ءبىراق ناقتى كۇنى مەن ورنى ءالى جاريالانباعانىن اتاپ ءوتتى.
بوكسشىلاردىڭ سالماق ايىرماشىلىعى 30 كەلىدەن (70 فۋنت) اساتىندىقتان، جەكپە-جەك رەسمي بولمايدى. تايسون 2024-جىلى دجەيك پولمەن وتكەن جەكپە-جەگىندە شامامەن 104 كەلى (228,5 فۋنت) سالماقتا بولدى، ال مەيۆەزەر كاسىبي رينگكە سوڭعى رەت 2017-جىلى شامامەن 68 كەلى (149,5 فۋنت) سالماقتا شىققان. سپورتشىلاردىڭ ەكەۋى دە بۇرىنعى قالىپتارىنان الىس. جەكپە-جەك كەزىندە تايسون شامامەن 60 جاستا بولادى، ال ودان 11 جاس كىشى مەيۆەزەر سوڭعى جىلدارى بلوگەرلەر مەن شوۋ-بيزنەس تۇلعالارىمەن كوبىنە كورمەلىك جەكپە-جەكتەر وتكىزىپ كەلەدى.
ساراپشىلاردىڭ پىكىرىنشە، قارجىلىق كەلىسىمدەر جەكپە-جەكتى ۇيىمداستىرۋدا ماڭىزدى ءرول اتقاردى. قولدا بار مالىمەتكە سايكەس، 48 جاستاعى مەيۆەزەر كەلىسىمشارتقا قول قويعاننان كەيىن ايتارلىقتاي تولەم الىپ ۇلگەرگەن.
بۇعان دەيىن الەمگە تانىمال بوكسشى كىشى روي دجونس Kazinform اگەنتتىگىنە بەرگەن ەكسكليۋزيۆ سۇحباتىندا ورتالىق ازيا وڭىرىندە كاسىبي بوكس ينفراقۇرىلىمىن دامىتۋ جونىندەگى ويلارىن، جاس تالانتتارعا تانىلۋ مەن جەتىستىككە جەتۋگە كومەكتەسۋ جوسپارلارى تۋرالى اڭگىمەلەدى.
