تاسقىن كەزىندە جەكە كومپانيا پەريزات قايرات باسقارعان قورعا 100 ميلليون تەڭگە اۋدارعان
استانا. KAZINFORM - ەلوردادا پەريزات قايرات پەن اناسى عايني الاشبايەۆاعا قاتىستى قىلمىستىق ءىس بويىنشا ءوتىپ جاتقان سوت پروتسەسىندە «RealBet» ج ش س- ءنىڭ جەتەكشى زاڭگەرى دامير اسكاروۆ كۋا رەتىندە جاۋاپ بەردى.
كۋاگەر 2024-جىلعى سۋ تاسقىنى كەزىندە پەريزات قايراتپەن بايلانىستى قورعا اۋدارىلعان 100 ميلليون تەڭگە قارجىنىڭ ءمان-جايىن باياندادى.
- بەلگىلى بولعانداي، سول كەزدە ءبىرقاتار وڭىردە سۋ تاسقىنى بولدى. ءبىز باق پەن الەۋمەتتىك جەلىلەردەن جاعدايدى باقىلاپ، قاراپايىم ازاماتتاردىڭ قانداي قيىندىققا تاپ بولعانىن كوردىك. وسى ورايدا كومپانيا باسشىلىعى زارداپ شەككەندەرگە كومەك كورسەتۋ جونىندە شەشىم قابىلدادى، - دەدى ول سوتتا.
زاڭگەردىڭ ايتۋىنشا، كومپانيا مۇقتاج جاندارعا كومەك كورسەتۋ ءۇشىن قاراجاتتى قانداي قور ارقىلى جىبەرۋگە بولاتىنىن ىزدەي باستاعان. ناتيجەسىندە، 2024-جىلعى 17-ساۋىردە Fortebank بانكىندەگى پەريزات قايرات قورىنىڭ ەسەپشوتىنا 100 ميلليون تەڭگە اۋدارىلعان.
كەيىن كومپانيا قور بويىنشا قىلمىستىق ءىس قوزعالعانىن بىلگەن. كۋاگەردىڭ ايتۋىنشا، كومپانيا بۇل جونىندە قارجىلىق مونيتورينگ اگەنتتىگىنە قاراجاتتى پەريزات قايرات قورىنا اۋدارعانىن راستاعان.
سوتتا «قورعا اۋدارىلعان قاراجاتتىڭ قالاي جۇمسالعانى تۋرالى ەسەپ الدىڭىزدار ما؟» دەگەن سۇراققا دامير اسكاروۆ: «ءبىز قاراجاتتىڭ ادال ماقساتتا جۇمسالاتىنىنا كۇماندانعان جوقپىز. سۋ تاسقىنىنان زارداپ شەككەن ادامدارعا شىنىمەن كومەكتەسەدى دەپ سەندىك»، - دەپ جاۋاپ بەردى كۋاگەر.
