تاسقىن بۇلدىرگەن ۇيلەردىڭ ورنىنا 80 جانە 160 شارشى مەترلىك ۇيلەر سالىنادى - مينيسترلىك
استانا. KAZINFORM - ونەركاسىپ جانە قۇرىلىس مينيسترلىگىنىڭ رەسمي وكىلى مەرۋەرت يبرايەۆا تاسقىننىڭ سالدارىنان بۇلىنگەن ۇيلەردىڭ ورنىنا قانداي باسپانا سالىناتىنىن ايتتى.
«كەشە پرەزيدەنت قاسىم-جومارت توقايەۆپەن كەزدەسۋ بارىسىندا ونەركاسىپ جانە قۇرىلىس ءمينيسترى قانات شارلاپايەۆ تابيعي اپاتتان زارداپ شەككەن ازاماتتاردىڭ تۇرعىن ءۇيىن قالپىنا كەلتىرۋ تۋرالى تاپسىرما الدى. وسى تاپسىرما اياسىندا مينيسترلىكتە جەدەل شتاب قۇرىلىپ، جاڭا تۇرعىن ءۇي سالۋدى كوزدەيتىن كەشەندى ءىس-قيمىل جوسپارى ازىرلەندى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.
سونداي-اق، ۆەدومستۆونىڭ رەسمي وكىلى اتالعان جوسپار اياسىندا تۇرعىن ۇيلەردىڭ ەكى ەسكيزدىك جوباسى ازىرلەنگەنىن اتاپ ءوتتى.
«بىرەۋى - 80 شارشى مەترلىك 3 بولمەلى جەكە تۇرعىن ءۇي، ەكىنشىسى - جالپى اۋدانى 160 شارشى مەتر بولاتىن ەكى پاتەرلى تۇرعىن ءۇي. ازىرلەنگەن تۇرعىن ۇيلەردىڭ جوبالارى مەملەكەتتىك ساراپتامادان وتەدى. بۇل بارلىق وڭىرلەردە تيپتىك-جوبالىق قۇجاتتاما نەگىزىندە جۇمىس جۇرگىزۋدى قامتاماسىز ەتەدى. بۇل جۇمىس كەلەسى اپتادا اياقتالىپ، ۇلگىلىك جوبالار مەملەكەتتىك ساراپتاما قورىتىندىسىمەن قوسا epsd.kz سايتىندا كوپشىلىككە ۇسىنىلادى»، - دەدى مەرۋەرت يبرايەۆا.
