تاريحي ءسات! ناريمان قۇربانوۆ - پاريج وليمپياداسىنىڭ كۇمىس جۇلدەگەرى
استانا. KAZINFORM - ناريمان قۇربانوۆ پاريج وليمپياداسىندا سپورتتىق گيمناستيكانىڭ ات سناريادىنداعى جاتتىعۋدا كۇمىس جۇلدەگە قول جەتكىزدى.
وتانداسىمىز اقتىق سىندا 15.443 ۇپاي الدى. وسىلايشا، ناريمان ەلىمىزگە سپورتتىق گيمناستيكادان وليمپيادانىڭ العاشقى مەدالىن سىيلادى.
«سپورتتىق گيمناستيكادان ۇلتتىق قۇراما كوشباسشىسىن قازاقستان قورجىنىنا كۇمىس جۇلدە سالعانىمەن شىن جۇرەكتەن قۇتتىقتايمىن! لايىقتى تۇردە جەڭىسكە جەتتى. قازاقستان قۇراماسى ءۇشىن وتە قۋانىشتىمىن جانە وسى جۇلدەگە سۇبەلى ۇلەس قوسقان بارلىق مامانعا، جاتتىقتىرۋشىلارعا العىس ايتامىن. وسى ورايدا ناريماننىڭ جوعارى كاسىبيلىگىن ەرەكشە اتاپ وتكىم كەلەدى. سپورتشىمىزعا جانكۇيەرلەر ۇلكەن سەنىم ارتتى، ودان مەدال كۇتتى. ال ناريمان قۇربانوۆ جانكۇيەرلەردىڭ ءۇمىتىن اقتاپ، قازاقستان قورجىنىنا كۇمىس جۇلدەنى سالدى. بۇل مەدال - وسى كۇنگە دەيىن توگىلگەن تەر مەن ەسەلى ەڭبەكتىڭ وتەۋى دەپ بىلەمىن. قازاقستاندىق سپورتشىلار الەمدىك ارەنادا كاسىبي شەبەرلىگىن كورسەتىپ جاتىر دەپ ماقتانىشپەن ايتا الامىز. بۇل - وليمپياداداعى سوڭعى جۇلدەمىز ەمەس ەكەنىنە، ءالى دە كوك تۋىمىز كوكتە جەلبىرەيتىنىنە سەنىمدىمىن. بارلىعىنا العىس ايتا وتىرىپ، ناريماندى كۇمىس جۇلدەسىمەن تاعى ءبىر مارتە قۇتتىقتايمىن!»، - دەدى تۋريزم جانە سپورت ءمينيسترى.
ايتا كەتەيىك، قازاقستاندىق ناريمان كۋربانوۆ جاتتىعۋدى ەڭ ءبىرىنشى بولىپ ورىنداپ، 15.433 ۇپاي الدى. ول بازالىق قيىندىعى 6.7-گە تەڭ جاتتىعۋدى ءساتتى ورىنداپ شىقتى.
بۇل سىندا التىن مەدالدى يرلانديالىق ريز ماكلەناگەن يەلەندى. ونىڭ ۇپاي كورسەتكىشى - 15.533.
ال قولا مەدال امەريكالىق شتەفان نەدوروچەكتىڭ ەنشىسىندە (15.300).
اۆتور
اسحات رايقۇل
