تاريحتان بەرى 220 مىڭ تونناعا جۋىق التىن وندىرىلگەن
استانا. KAZINFORM - ادامزات تاريحىندا وندىرىلگەن التىننىڭ جالپى كولەمى 2025 -جىلدىڭ سوڭىنا قاراي شامامەن 220 مىڭ تونناعا جەتىپ، ونىڭ نارىقتىق قۇنى 31 تريلليون دوللار شاماسىندا باعالانعان. بۇل دەرەكتەر World Gold Council ەسەبىندە كەلتىرىلگەنىن بەلتا حابارلادى.
ساراپشىلاردىڭ مالىمەتىنشە، التىن قورىنىڭ باسىم بولىگى زەرگەرلىك بۇيىمدار تۇرىندە ساقتالعان - 44 پايىز نەمەسە 97,65 مىڭ توننا (شامامەن 14 تريلليون دوللار). قۇيمالار مەن مونەتالار ۇلەسىنە 21 پايىز (46,95 مىڭ توننا، 7 تريلليون دوللار)، ال ورتالىق بانكتەردىڭ رەزەرۆتەرىنە 18 پايىز (38,67 مىڭ توننا، 5 تريلليون دوللار) تيەسىلى.
سونىمەن قاتار، التىنمەن قامتاماسىز ەتىلگەن ETF قورلارىندا 2 پايىز (4,025 مىڭ توننا، 0,6 تريلليون دوللار)، ينستيتۋتسيونالدىق جانە جەكە ينۆەستورلاردىڭ بيرجادان تىس اكتيۆتەرىندە 5 پايىز (شامامەن 10 مىڭ توننا، 1,5 تريلليون دوللار) ساقتالعان. ال قالعان 10 پايىز (22,6 مىڭ توننا، 3 تريلليون دوللار) ونەركاسىپ پەن تەحنولوگيا سالالارىندا پايدالانىلادى.
مامانداردىڭ ايتۋىنشا، التىن ءىس جۇزىندە جويىلمايتىن مەتالل بولعاندىقتان، بۇرىن وندىرىلگەن قورلار اينالىمدا قالا بەرەدى. سوندىقتان نارىق تەك جاڭا ءوندىرىس ەسەبىنەن عانا ەمەس، بار قورلاردىڭ قايتا ءبولىنۋى ارقىلى دا قالىپتاسادى.
التىن قورى جىلىنا شامامەن 1,8 پايىز ءوسىپ وتىرادى. بۇل باياۋ ءوسىم ۋاقىت وتە كەلە تاپشىلىقتى كۇشەيتىپ، ونىڭ ۇزاق مەرزىمدى قۇنىن قولدايدى. ساراپشىلار قىسقا مەرزىمدى سۇرانىس وزگەرىستەرى، اسىرەسە ينۆەستيتسيالىق اعىندار اسەرىنەن، التىن باعاسىنا ايتارلىقتاي ىقپال ەتۋى مۇمكىن ەكەنىن اتاپ وتەدى.
بۇعان دەيىن تاياۋ شىعىستاعى قاقتىعىسقا بايلانىستى التىن مەن كۇمىستىڭ باعاسى ارزانداعانىن جازدىق.
