تارازدا وقۋشى سوت ارقىلى اكەسىنەن اليمەنت ءوندىرىپ الدى

11-سىنىپ وقۋشىسى اي سايىن 68 مىڭ تەڭگە كولەمىندە وقۋ اقىسىن تولەيدى.

2008 -جىلى وقۋشىنىڭ اكەسى ەكى بالاسىنا، ونىڭ ىشىندە وسى قىزىنا قاتىستى اتا-انا قۇقىقتارىنان باس تارتۋ تۋرالى ارىز جازىپ، ونى نوتاريالدى تۇردە كۋالاندىرعان.

2018 -جىلى قىزدىڭ اناسى مەن اعاسى قايتىس بولعان. قازىرگى ۋاقىتتا ول اجەسىمەن بىرگە تۇرادى جانە تولىقتاي ونىڭ اسىراۋىندا.

اكەسى ەشقانداي ماتەريالدىق كومەك كورسەتپەگەن، قارىم-قاتىناستان قاشقاقتاعان، ال كومەك سۇراعان كەزدە قىزىنىڭ تەلەفون ءنومىرىن بۇعاتتاپ وتىرعان.

سوتقا اليمەنت ءوندىرۋ تۋرالى تالاپ قويۋمەن جۇگىنگەندە، وقۋشى ءوزىنىڭ قارجىلىق قيىندىقتارعا تاپ بولعانىن كورسەتكەن: وقۋ مەن تۇرمىسقا بايلانىستى بارلىق شىعىندى اجەسى وتەيدى. ال قاراجات تەك ازىق-تۇلىك پەن ەڭ قاجەتتى قاجەتتىلىكتەرگە عانا جەتەدى.

سوتتا اكەسى تالاپتى ءىشىنارا قاناعاتتاندىرۋدى سۇراپ، باسقا نەكەدەن تۋعان ءتورت بالاسىنىڭ بار ەكەنىن جانە نەسيەلىك مىندەتتەمەلەرىن العا تارتقان. الايدا ونىڭ ەڭبەككە قابىلەتتى ەكەنى جانە بىرنەشە كاسىپورىننان تابىس تاباتىنى انىقتالعان.

سونىمەن قاتار، شەشىم شىعارىلعان كۇنى جاۋاپكەر جەكە كاسىپكەر رەتىندە تىركەۋدەن شىققانى، ال وعان دەيىن كوپ ۇزاماي تاعى ءتورت بالاعا اكەلىك قۇقىقتى رەسىمدەگەنى بەلگىلى بولعان.

سوت مۇنى اليمەنت مولشەرىن جاساندى تۇردە تومەندەتۋگە باعىتتالعان ارەكەت رەتىندە باعالادى.

تاراز قالالىق سوتى اكەدەن قىزى مەكتەپتى اياقتاعانعا دەيىن اي سايىن 17 ا ە ك (66844 تەڭگە) مولشەرىندە اليمەنت ءوندىرۋ تۋرالى شەشىم شىعاردى.

اكەسى بۇل شەشىمگە اپەللياتسيالىق تارتىپپەن شاعىمدانعان.

جامبىل وبلىستىق سوتى ءبىرىنشى ساتىداعى سوت شەشىمىن وزگەرىسسىز قالدىردى.

سوت اكتىلەرى زاڭدى كۇشىنە ەندى.

ايتا كەتەيىك، شەتەلدىكتەردىڭ قازاقستان ازاماتتارىمەن ورتاق بالالارى بولعان جاعدايدا اليمەنت تولەتۋ تەتىكتەرى بار. بۇل جونىندە ق ر ادىلەت مينيسترلىگى ماجبۇرلەپ ورىنداتۋ كوميتەتىنىڭ ءتوراعاسى ماقسات بالابەكوۆ ورتالىق كوممۋنيكاتسيالار قىزمەتىندە وتكەن بريفينگىدە مالىمدەدى.

الماتىدا 17 بورىشكەرگە اليمەنتتەن جالتارعانى ءۇشىن ءىس قوزعالدى.