تاقيا، بورىك، ساۋكەلە: قازاق سپورتشىلارىنىڭ وليمپيادادا كيەتىن كيىمى تانىستىرىلدى
استانا. KAZINFORM - ءماجىلىستىڭ الەۋمەتتىك-مادەني دامۋ كوميتەتىنىڭ وتىرىسىندا تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەربول مىرزابوسىنوۆ ءماجىلىس دەپۋتاتتارىنا قازاقستان سپورتشىلارىنىڭ پاريج وليمپياداسىنا كيىپ باراتىن كيىم ۇلگىلەرىن تانىستىردى.
«ازيا ويىندارىنان كەيىن ءبىرقاتار سۇراق تۋىنداعان بولاتىن. سونىڭ نەگىزىندە باق وكىلدەرىنە، قوعامدىق ۇيىم، سپورتشىلاردان ارنايى كوميسسيا قۇرىلىپ، جۇمىس ىستەدى. ەڭ ءبىرىنشى نۇسقا - تۋ ۇستاپ شىعاتىن اسلانبەك شىمبەرگەنوۆ پەن نادەجدا دۋبوۆيتسكايانىڭ كيىمى. ەكەۋى دە ۇلتتىق ناقىشتا تىگىلەدى. ەر ادامنىڭ كيىمىندە بورىك بولسا، قىزدا ساۋكەلە بار. ارنايى كوميسسياعا 15 ۇيىمنىڭ ءوتىنىمى ءتۇستى. سول 15 وتىنىمنەن تاڭداپ الىندى. ال قالعان سپورتشىلارىمىز پارادقا كيىپ شىعاتىن فورما كلاسسيكالىق ۇلگىدە بولادى. ول كەزدە پاريجدە 40 گرادۋسقا دەيىن ىستىق بولاتىنىن بىلەسىزدەر. اۋانىڭ ىلعالى دا جوعارى. سوندىقتان ارنايى ماتادان جەڭسىز نۇسقاسى تىگىلەدى. ەر سپورتشىلاردىڭ باسىندا تاقيا، قىزدار فورماسىنىڭ ءبىر ۇلگىسىندە شالبار، ەكىنشى نۇسقاسىندا يۋبكا بولادى. ەكى نۇسقاسى دا بولادى»، - دەدى ول.
كوميتەت باسشىسى بيىل سپورتشىلاردىڭ وليمپيادالىق فورماسى تاعى ءبىر تۇرمەن تولىققانىن اتادى.
«سونىمەن بىرگە پارادتىق سپورت فورماسى بار، سپورتشىلارىمىز ماراپاتتاۋ راسىمىندە كيەدى. ونىڭ دا ەر بالالارعا جانە قىزدارعا ارنالعان نۇسقاسى بار. سونداي-اق، سپورتتىق فورما بار. بۇعان دەيىن سپورت فورماسى مەن پارادتىق سپورت فورماسى بىرەۋ بولاتىن. قازىر ءبىز سپورتشىلارعا ىڭعايلى بولۋ ءۇشىن شەتەلدىك برەند Joma-دان تولىق 16 نۇسقالى كيىم الىپ بەرەمىز. ونى سپورتشىلار جولدا، دايىندىق كەزىندە كيەدى. بۇل ءوزى جاقسى ماتادان جاسالعان، حالىقارالىق برەند. ازيا ويىندارىنىڭ قورىتىندىسى بويىنشا، سپورتشىلاردىڭ تالاپ-تىلەكتەرىنە تالداۋ جاساپ، سونىڭ نەگىزىندە حالىقارالىق برەندكە تاپسىرىس بەردىك. بۇكىل فورما دەمەۋشىلەردىڭ ەسەبىنەن الىنادى. 15 نۇسقادان وسى ۇلگى تاڭداپ الىندى. ەندى تىگە باستايمىز. بۇل جولى بۇل كيىمدەردى سپورتشىلارعا ويىنداردىڭ باستالۋىنا 35 كۇن قالعاندا تاراتامىز»، - دەدى ەربول مىرزابوسىنوۆ.
اۆتور
ەسىمجان ناقتىباي
