تاماق پىسىرەر الدىندا شيكى ەتتى جۋۋ كەرەك پە؟ ەندوكرينولوگ كەڭەسى
استانا. قازاقپارات - تازالىق ساقتاۋدى ادەتكە اينالدىرعان دۇرىس ەكەنىن ءبارىمىز بىلەمىز. ادەتتە كىر جۋۋ، دۋشقا ءتۇسۋ، ءۇي جيناۋ، جەمىستەر مەن كوكونىستەردى جۋۋدا ارتىق سۇراق تۋىندامايدى. ال تاماق پىسىرەر الدىندا شيكى ەتتى جۋۋعا كەلگەندە پىكىرتالاس ءجيى كەزدەسەدى. شيكى ەتتى جۋۋ كەرەك پە؟ ەتتى قالاي ءپىسىرىپ جەگەن پايدالى؟ بۇل سۇراقتارعا ەندوكرينولوگ ماحاببات يبراگيم جاۋاپ بەردى.
الەۋمەتتىك جەلىلەردە اس ءۇي حانشايىمدارى مەن ماماندار تاماق پىسىرەر الدىندا شيكى ەتتى جۋۋ كەرەك پە، جوق پا، دەگەن سۇراققا ەكى ءتۇرلى جاۋاپ بەرەدى. ءبىرى - ەتتى مىندەتتى تۇردە جۋۋ كەرەگىن ايتسا، باسقالارى ونى جۋعان كەزدە ەتتەگى باكتەريالار اس ۇيگە شاشىرايتىنىن جانە ول باسقا زاتتار ارقىلى ادام اعزاسىنا جۇعاتىنىن ايتادى. سونداي-اق ولار ەتتى قۋىرعاندا ول تەرميالىق وڭدەۋدەن وتەتىنىن دە نەگىزگە الادى. بۇل سۇراقتىڭ دۇرىس جاۋابىن ءبىلۋ ءۇشىن مامان كومەگىنە جۇگىندىك.
قانداي جاعدايدا ەتتى جۋماۋعا بولادى؟
ماحاببات يبراگيم قانداي جاعدايدا شيكى ەتتى جۋماۋعا بولاتىنىن ايتتى.
«ەگەر ءوزىڭىز مال سويىپ نەمەسە سەنىمدى جەردەن ساتىپ الساڭىز، بۇكىل انتيسەپتيكالىق شارالار ساقتالعان بولسا وندا ەتتى جۋماسا دا بولادى. ءبىراق ەت قايناتىپ جاتقاندا ءبىرىنشى قايناعان سورپاسىن توگىپ تاستايسىز»، - دەيدى مامان.
قانداي جاعدايدا ەتتى جۋۋ كەرەك؟
الايدا ەندوكرينولوگ ەتتى جۋۋ كەرەك جاعدايلار دا بار ەكەنىن ەسكەرتتى.
«بازار، ماركەت نەمەسە ت. ب جەردەن الساڭىز، ەتتى جۋعان دۇرىس، ويتكەنى ەت بىرنەشە قولدان ءارى وڭدەۋدەن وتەدى، ەتتى اعىپ تۇرعان سۋىق سۋعا جۋاسىز. ەتتى قاعاز مايلىق ارقىلى ارتىق سۋىن كەپتىرىپ، ءارى قاراي تاماققا قولدانا بەرەسىز»، - دەيدى ول.
ەندوكرينولوگ ەت جۋىلعان ىدىستى نەمەسە شۇڭعىلشانى ىدىس جۋاتىن قۇرالمەن جۋىپ، ارتىنان ىستىق سۋمەن شايىپ، قۇرعاتۋ كەرەگىن جانە قولدانعان مايلىقتى، سورعىشتى قوقىسقا تاستاۋ كەرەگىن ايتتى.
ەتتى قالاي ءپىسىرىپ جەگەن پايدالى؟
«ەتتى پايدالى دايىنداۋ ءتاسىلى - ونى قايناتۋ. ال ەتتەگى كوبىكپەن بىرگە شىققان قالدىقتاردى ءسۇزىپ الىپ تاستاڭىز جانە ەتتى جاي وتتا بۇقتىرىپ دايىنداڭىز. سول كەزدە ەتتەگى زياندى باكتەريالاردى كوبىكپەن بىرگە الامىز، ال قالعانى ىستىق وتتا ۇزاق ءپىسۋ كەزىندە جويىلادى. ەتتى دايىنداۋ ۋاقىتى - 40 مينۋتتان 2 ساعاتقا دەيىن سوزىلادى (ۋاقىت ەتتىڭ ءتۇرى مەن دايىنداۋ تاسىلىنە قاراي ءارتۇرلى بولادى)»، - دەيدى ماحاببات يبراگيم.
مامان ەت - اقۋىز كوزى، ونسىز اعزا كوپتەگەن تاپشىلىققا تاپ بولىپ، ءتۇرلى اۋرۋعا شالدىعۋى مۇمكىن ەكەنىن اتاپ ءوتتى.
«ماسساگەت»
