تالىپتەر ترامپتىڭ اۋعانستانداعى باگرام اۋە بازاسىن قايتارۋ تۋرالى تالابىن قابىلداعان جوق

استانا. KAZINFORM - «تاليبان» قوزعالىسى ا ق ش پرەزيدەنتى دونالد ترامپتىڭ قوقان-لوققىسىن ەلەمەدى جانە ونىڭ اۋعانستانداعى 20 جىلعا سوزىلعان سوعىس كەزىندە ۆاشينگتون باقىلاۋىندا بولعان باگرام اۋە بازاسىن بەرۋ تۋرالى تالابىن قابىلداعان جوق، دەپ حابارلايدى Al Jazeera.

تاليبان جەكسەنبى كۇنى «اۋعانستاننىڭ تاۋەلسىزدىگى مەن اۋماقتىق تۇتاستىعى بارىنەن ماڭىزدى» دەپ مالىمدەپ، ا ق ش-تى كۇش قولدانۋدان باس تارتىپ، بۇرىنعى كەلىسىمدەردى ورىنداۋعا شاقىردى.

- سايكەسىنشە، بۇل بۇرىنعى ءساتسىز تاسىلدەردى قايتالاماي، شىنايىلىق پەن پاراساتتىلىق ساياساتىن جۇرگىزۋ قاجەتتىگىن تاعى ءبىر رەت كورسەتەدى، - دەلىنگەن اۋعانستان ۇكىمەتىنىڭ رەسمي مالىمدەمەسىندە.

ترامپ جاقىندا اۋە بازاسىن قايتارۋعا مۇددەلى ەكەنىن ءبىلدىردى.

- قازىر ءبىز اۋعانستانمەن كەلىسسوز جۇرگىزىپ جاتىرمىز جانە ونى مۇمكىندىگىنشە تەزىرەك، دەرەۋ قايتارعىمىز كەلەدى. ال ەگەر ولار مۇنى جاساماسا، مەن نە ىستەيتىنىمدى كورەسىزدەر، - دەدى ترامپ سەنبى كۇنى اق ۇيدە تىلشىلەرگە.

ا ق ش پرەزيدەنتى كەيىنىرەك TruthSocial الەۋمەتتىك جەلىسىندە مالىمدەمە جاسادى.

- ەگەر اۋعانستان باگرام اۋە بازاسىن ونى سالعان ا ق ش-قا قايتارماسا، كەلەڭسىز جاعدايلار بولادى، - دەپ جازدى اق ءۇي باسشىسى.

باگرام - كابۋلدان سولتۇستىككە قاراي 50 شاقىرىم جەردە ورنالاسقان ۇلكەن اۋە بازاسى. ول تاليبانمەن ەكى ونجىلدىق سوعىس كەزىندە ا ق ش-تىڭ نەگىزگى اسكەري ورتالىقتارىنىڭ ءبىرى بولدى. بازانى باقىلاۋ 2021 -جىلى ەلدە قوزعالىس بيلىككە كەلىپ، باتىس اسكەرلەرى شىعارىلعان كەزدە تالىپتەر قولىنا ءوتتى.

ترامپ العاش رەت ۇلى بريتانياعا مەملەكەتتىك ساپارى كەزىندە ۇلى بريتانيا پرەمەر-ءمينيسترى كير ستارمەرمەن وتكەن باسپا ءسوز ءماسليحاتىندا بازانى قايتارۋعا كۇش سالىپ جۇرگەنىن جاريالادى.

- ءبىز ونى قايتارۋعا تىرىسىپ جاتىرمىز، ويتكەنى ولار بىزدەن بىردەڭە العىسى كەلەدى. ءبىز بۇل بازانى قايتارعىمىز كەلەدى. بۇل بازانى قالاۋىمىزدىڭ ءبىر سەبەبى، وزدەرىڭىز بىلەتىندەي، بۇل قىتاي يادرولىق قارۋىن شىعاراتىن جەردەن ءبىر ساعاتتىق جەردە ورنالاسقان، - دەدى امەريكا باسشىسى.

ترامپ سونىمەن بىرگە ا ق ش باگرامدى تاليبانعا «جاي عانا» بەرگەنىن مالىمدەدى. اۋعانستاننىڭ رەسمي تۇلعالارى ا ق ش-تىڭ ەلدەگى قاتىسۋىن قالپىنا كەلتىرۋگە ءۇزىلدى-كەسىلدى قارسى شىقتى.

- اۋعاندىقتار تاريح بويى ءوز جەرىندە شەتەلدىك اسكەريلەردىڭ بولۋىنا ەشقاشان شىداماعان، - دەپ مالىمدەدى اۋعانستان سىرتقى ىستەر مينيسترلىگىنىڭ باسپا ءسوز حاتشىسى زاكير دجالالي.

ول سونداي-اق ەكى ەل «ەكى جاقتى قۇرمەت پەن ورتاق مۇددەگە نەگىزدەلگەن ەكونوميكالىق جانە ساياسي قارىم-قاتىناستاردى» دامىتۋ قاجەتتىگىن قوسىپ ءوتتى.

بۇعان دەيىن اۋعانستاننىڭ التى پروۆينتسياسىندا ينتەرنەت شەكتەلگەنىن جازعان بولاتىنبىز.