تاۋ قارىنان قاۋىپ بار ما
استانا. KAZINFORM - «قازگيدرومەت» ماماندارى ءبىرقاتار وڭىردە تاۋلاردى ءالى دە قار باسىپ جاتقانىن حابارلادى. ەگەر كۇن كۇرت جىلىنىپ، جاۋىن-شاشىن مولىنان تۇسەر بولسا سۋ تاسقىنى تۋىنداۋى مۇمكىن.
«قازگيدرومەتتىڭ» بولجاۋىنشا، الداعى كۇندەرى ەلىمىز بويىنشا جاۋىن-شاشىن كۇتىلىپ وتىر. تابيعي قۇبىلىس نورمادان جوعارى بولۋى مۇمكىن. سولتۇستىك، ورتالىق جانە شىعىس وبلىستاردا تۇندە جاڭبىر جاۋىپ، ارتىنان قار تۇسەدى دەپ بولجانۋدا. ەلىمىز بويىنشا جەلدىڭ جىلدامدىعى دا ارتپاق. ءساۋىر ايىنىڭ ەكىنشى ونكۇندىگىندە قازاقستاننىڭ بارلىق اۋماعىندا كۇن 20-22 گرادۋسقا دەيىن جىلى بولادى دەپ كۇتىلۋدە.
«مەتەوستانتسيالارداعى ۇزاق مەرزىمدى باقىلاۋلارعا سايكەس، ءبىر ايلىق جاۋىن-شاشىن ءبىر كۇندە ءتۇسىپ، قاۋىپتى تابيعي گيدرومەتەورولوگيالىق قۇبىلىستار ورىن الۋى مۇمكىن. تەمپەراتۋرانىڭ جوعارىلاۋى جانە جاۋىن مولىنان تۇسكەن جاعدايدا قازاقستاننىڭ وڭتۇستىگىندەگى، وڭتۇستىك- شىعىسىنداعى جانە شىعىسىنداعى تاۋلى وزەندەردىڭ بويىندا قاتتى جاڭبىرلى سۋ تاسقىنى بولۋى مۇمكىن»، - دەلىنگەن «قازگيدرومەت» حابارلاماسىندا.
