سيفرلىق اكتيۆتەردەن تۇسكەن تابىسقا سالىق سالىنا ما

جاساندى ينتەللەكت جانە سيفرلىق دامۋ ءمينيسترى جاسلان ماديەۆتىڭ ايتۋىنشا، جەڭىلدىك 2026-جىلعى 1-قاڭتاردان 2028-جىلعى 31-جەلتوقسانعا دەيىن قولدانىلادى.

- مۇنداي جەڭىلدىك تەك سيفرلىق اكتيۆتەرمەن جاسالعان وپەراتسيالار قازاقستاندىق پروۆايدەرلەر ارقىلى جۇرگىزىلگەن جاعدايدا عانا بەرىلەدى. بۇل ازاماتتاردى شەتەلدىك پلاتفورمالاردان قازاقستاندىق پروۆايدەرلەرگە كوشۋگە ىنتالاندىرۋ ءۇشىن ەنگىزىلىپ وتىر، - دەدى مينيستر.

سونىمەن قاتار 1-قىركۇيەككە دەيىن سيفرلىق اكتيۆتەردى شەتەلدىك پلاتفورمالاردان قازاقستاندىق پروۆايدەرلەرگە كوشىرۋدى ىنتالاندىراتىن قوسىمشا سالىقتىق شارالار ازىرلەنىپ جاتىر.

- بۇل بيۋجەت شىعىنى ەمەس. كەرىسىنشە، زاڭدى نارىقتى كەڭەيتۋگە سالىنعان ينۆەستيتسيا. كريپتويندۋستريادان تۇسەتىن سالىق تۇسىمدەرى 2023-جىلعى 9 ميلليارد تەڭگەدەن 2025-جىلى 15 ميلليارد تەڭگەدەن استى، - دەدى جاسلان ماديەۆ.

ايتا كەتەيىك، قازاقستاندا سيفرلىق اكتيۆتەردى ەرىكتى تۇردە جاريا ەتۋ تەتىگى ەنگىزىلەدى.