سىنىپتاسىن قۇلدىقتا ۇستادى دەگەن كۇدىككە ىلىنگەن قىزىلوردالىق وقۋشىلار يزولياتوردان ءۇيقاماققا اۋىستىرىلدى
قىزىلوردا. KAZINFORM - قىزىلوردا قالاسىندا سىنىپتاسىن سەكس-قۇلدىقتا ۇستادى دەگەن كۇدىككە ىلىنگەن مەكتەپ وقۋشىلارى ءۇيقاماققا اۋىستىرىلدى.
ءمالىم بولعانداي، قوعامدىق قورعا جاعدايدى وقۋشى قىزدىڭ اتا-اناسى حابارلاعان. ال وقۋشىنىڭ سەكس- قۇلدىقتا جۇرگەنىن ونىڭ دوسى انىقتاعان.
بۇل جونىندە العاشقى بولىپ قوعامدىق قوردىڭ باسشىسى دينا ءتاڭسارى حابارلاعان.
«وسىعان بايلانىستى تۇسىنىكتەمە بەرگەن قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتى « قىزىلوردا پوليتسياسى اتالعان دەرەك بويىنشا كۇدىكتىلەردى ۇستاپ، ۋاقىتشا ۇستاۋ يزولياتورىنا قاماعان. قازىرگى تاڭدا ءىس بويىنشا ءتيىستى ساراپتامالار تاعايىندالىپ، تەرگەۋ جالعاسىپ جاتىر. ق ر ق پ ك- ءنىڭ 201 بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋتسياسىنىڭ 77-بابى 3- ءبولىمى، 1-تارماعى، ق ر ق ك- ءنىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى»، - دەپ اتاپ ءوتتى.
كۇدىكتىلەردىڭ ءۇيقاماققا اۋىستىرىلعانى جونىندە قىزىلوردا وبلىستىق سوتى تومەندەگىشە تۇسىنىكتەمە بەردى.
«اتالعان ءوتىنىشحاتتاردى قىزىلوردا قالاسىنىڭ تەرگەۋ سوتى قاراعان. كۇدىكتىلەرگە، كامەلەتكە جاسىنا تولماعاندارعا ءۇيقاماق تۇرىندەگى سانكتسيالار قولدانىلدى. قازىرگى ۋاقىتتا تەرگەۋ سوتىنىڭ قاۋلىلارىنا جابىرلەنۋشى تاراپتان قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىنا شاعىم كەلىپ ءتۇستى. ول قارالۋ ساتىسىندا تۇر. قاۋلىعا قالعان قاتىسۋشىلار شاعىم جاساماعان»، - دەپ ءمالىم ەتتى وبلىستىق سوتتان.
بۇدان بۇرىن حابارلاعانىمىزداي، قىزىلوردا قالاسىندا مەكتەپ وقۋشىلارى سىنىپتاسىن سەكس- قۇلدىقتا ۇستاعان. ءبىر توپ جاس ءوسپىرىم 16 جاستاعى قىزدى قيناپ ۇستاعان، ەسىرتكى بەرىپ، جەزوكشەلىكپەن اينالىسۋعا ماجبۇرلەگەن.
