پسيحولوگ كەڭەسى: بالانى مەكتەپكە قاي جاستا بەرگەن دۇرىس؟

استانا. قازاقپارات - شەشىم قابىلداعاندا بالانىڭ جەكە ەرەكشەلىكتەرىن، دايىندىق دەڭگەيىن جانە الەۋمەتتىك ورتاسىن ەسكەرۋ كەرەك.بالانى قاي جاستا مەكتەپكە بەرۋ كەرەك؟ بۇل اتا-انالاردى ءجيى مازالايتىن سۇراق. ەرتەرەك بەرگەن دۇرىس پا، الدە بالانىڭ ەرەكشەلىگىنە، دامۋىنا نازار اۋدارعان ءجون بە؟ مۇنداي جاعدايدا ماماندار نە دەيدى؟ 

مامانداردىڭ پىكىرىنشە، بالانى 5 جاسىندا مەكتەپكە بەرۋ دۇرىس ەمەس. ولاردىڭ ايتۋىنشا، بۇل جاستا بالالاردىڭ فيزيكالىق، ينتەللەكتۋالدىق جانە ەموتسيونالدىق دامۋ دەڭگەيى مەكتەپتىڭ تالاپتارىنا ساي كەلمەۋى مۇمكىن.

ادەتتە بالالاردى 6-7 جاسىندا مەكتەپكە بەرۋ ۇسىنىلادى. ءبىراق شەشىم قابىلداعاندا ونىڭ جەكە ەرەكشەلىكتەرىن، دايىندىق دەڭگەيىن جانە الەۋمەتتىك ورتاسىن ەسكەرۋ كەرەك. كەيبىر بالالار بۇل جاستا دا مەكتەپكە دايىن بولماۋى مۇمكىن. مۇنداي كەزدە بالانى قيناماي، وقۋدى ءبىر جىل كەيىنگە قالدىرۋ قالىپتى جاعداي.

الايدا ماماندار بالانىڭ دامۋىنا بالا كەزدەن نازار اۋدارۋعا كەڭەس بەرەدى، ەگەر ونىڭ دامۋى تەجەلسە، بىردەن ماماندارعا جۇگىنگەن دۇرىس.

پسيحولوگ، ىزگىلىك پەداگوگيكا ۇستازى اياۋلىم باقىتوۆا بۇل ماسەلەگە قاتىستى پىكىر ءبىلدىردى. ونىڭ ايتۋىنشا، بالادا «مەن» دەگەن تۇسىنىك قالىپتاسپايىنشا، مەكتەپكە بەرمەگەن دۇرىس.

- ادەتتە 7 جاستا الەۋمەتتىك تۇرعىدان بالادا «مەن» دەگەن تۇسىنىك قالىپتاسادى. بالا «وقۋشى» سياقتى جاڭا پوزيتسيانىڭ ءمانىن تۇسىنە باستايدى. كەشەگى ويىن بالاسى مەكتەپ تابالدىرىعىن اتتاعان كۇننەن باستاپ، ومىرىندە بولاتىن ۇلكەن وزگەرىس، جاڭا قوعامعا ەنۋ، وزىنە جاڭا مىندەتتەردى جۇكتەۋ، جاڭا ورتاعا بەيىمدەلۋ، قارىم-قاتىناستا بولۋ، ياعني جەتىلۋ سىندى دامۋ ساتىسىندا بولادى. ەندەشە، بالا پسيحيكاسى دا وزگەرىپ، ىشكى ەموتسيالارى قالىپتاسا باستايدى، ءتۇرلى قىزىعۋشىلىقتارى ويانىپ، ءوزىنىڭ ورنىن باعالاۋعا بەيىمدەلەدى.

پسيحولوگيالىق تۇرعىداعى دامۋ كورسەتكىشتەرىنە توقتالاتىن بولساق: قابىلداۋ قابىلەتى اناليتيكالىق سيپاتقا يە بولىپ، بىلۋگە قۇشتارلىعى زور بولادى؛ ەستە ساقتاۋدىڭ مەحانيكالىق ءتۇرى ىسكە قوسىلادى؛ ويلاۋدىڭ كورنەكى-بەينەلى ءتۇرى جەتەكشى بولادى؛ سويلەۋ ءتىلى سيپاتتاۋعا ىڭعايلانادى؛ پسيحيكالىق ءىس-ارەكەتتىڭ ىرىقسىز قالىپتارىنان ىرىقتى قالىپتارىنا بىرتىندەپ وتە باستايدى. سوعان سايكەس، بالانىڭ وقۋعا دەگەن موتيۆاتسياسى مەن قىزىعۋشىلىعى ويانىپ، نيەتى مەن داعدىسى قالىپتاسا باستايدى؛ وقۋ ارەكەتىنە بەلسەندىلىگى ارتادى؛ تانىمدىق وي-ءورىسى ارتا جەتىلەدى.

جالپى ايتقاندا، 7 جاستاعى بالا دامىپ، وقۋعا تولىق دايىن بولادى. سول سەبەپتى وسى جاس - مەكتەپكە بارۋعا ناعىز قولايلى جاس، - دەيدى مامان.

Massaget.kz