نەسيە بويىنشا تولەم جاساۋ قيىنداسا نە ىستەۋ كەرەك؟
استانا. KAZINFORM – ەگەر قارجىلىق جاعدايىڭىز ناشارلاپ، نەسيە بويىنشا تولەمدەردى ۋاقىتىندا تولەۋ مۇمكىندىگى بولماسا، بانك شارت تالاپتارىن وزگەرتە الادى.
بۇل پروتسەسس قارىزدى قايتا قۇرىلىمداۋ (رەسترۋكتۋريزاتسيا) دەپ اتالادى. ول اي سايىنعى جۇكتەمەنى ازايتۋعا جانە تولەم مەرزىمىن وتكىزىپ الماۋعا كومەكتەسەدى.
بانك تابىستىڭ تومەندەۋىنە قاتىستى وبەكتيۆتى سەبەپتەر بولعان جاعدايدا ءوتىنىشتى قاراستىرادى.
ولارعا مىنالار جاتادى:
تابىستىڭ ازايۋى نەمەسە جۇمىستان ايىرىلۋ؛
اۋىر سىرقات نەمەسە مۇگەدەكتىك؛
بالا كۇتىمىنە بايلانىستى دەمالىس؛
اسكەري قىزمەتكە شاقىرىلۋ؛
توتەنشە جاعدايلار (مىسالى، ءورت نەمەسە مۇلىكتى ۇرلاۋ).
ءوتىنىشتى نەعۇرلىم ەرتە بەرسەڭىز، ايىپپۇلداردان، نەسيە تاريحىنىڭ ناشارلاۋىنان جانە ىقتيمال سوت ىستەرىنەن اۋلاق بولۋ مۇمكىندىگى سوعۇرلىم جوعارى بولادى.
قالاي ءوتىنىش بەرۋگە بولادى؟
ءوتىنىش بەرۋ ءۇشىن بانككە حابارلاسىپ، قارجىلىق قيىندىقتاردىڭ سەبەبىن ءتۇسىندىرۋ قاجەت. سونىمەن قاتار راستايتىن قۇجاتتاردى (مىسالى، تابىس تۋرالى انىقتاما نەمەسە مەديتسينالىق قورىتىندى) قوسا بەرۋ كەرەك. ادەتتە، بانك ءوتىنىشتى 15 كۇنتىزبەلىك كۇن ىشىندە قاراستىرىپ، شەشىمدەر ۇسىنادى.
بانك قانداي شارالاردى ۇسىنۋى مۇمكىن؟
نەسيە مەرزىمىن ۇزارتۋ - تولەم ازايادى، ءبىراق جالپى ارتىق تولەم مولشەرى ءوسۋى مۇمكىن؛
پايىزدىق مولشەرلەمەنى تومەندەتۋ؛
تولەمدەردى بەلگىلى ءبىر مەرزىمگە شەگەرۋ (كەيىنگە قالدىرۋ)؛
ايىپپۇلدار مەن ءوسىمپۇلداردىڭ ءبىر بولىگىن ەسەپتەن شىعارۋ.
ەگەر بانك باس تارتسا، بانكتەگى نەسيەلەر بويىنشا بانك ومبۋدسمەنىنە، ال م ق ۇ- داعى (ميكروقارجى ۇيىمى) قارىزدار بويىنشا ميكروقارجى ومبۋدسمەنىنە جۇگىنۋگە بولادى. سونداي-اق، ەسكى قارىزدى وتەۋ ءۇشىن تيىمدىرەك شارتتارمەن جاڭا نەسيە راسىمدەۋ، ياعني قايتا قارجىلاندىرۋ (رەفينانسيروۆانيە) نۇسقاسىن دا قاراستىرۋعا بولادى.
جاعدايعا بەيجاي قاراۋعا بولمايدى. نەسيە بەرۋشىگە ۋاقىتىندا جۇگىنۋ بورىشتىق جۇكتەمەنى ازايتۋعا، ايىپپۇلداردان قۇتىلۋعا جانە قارجىلىق تۇراقتىلىقتى ساقتاۋعا كومەكتەسەدى.
