سوتتا الماتى اۋەجايىنداعى وقيعاعا قاتىستى تىڭ دەرەكتەر ايتىلدى
الماتى. KAZINFORM - الماتى اۋەجايىندا قىزمەتكەردى كەپىلگە العان ەر ادامعا قاتىستى سوت وتىرىسى باستالدى.
سوت وتىرىسى تۇركسىب اۋداندىق سوتىندا ءوتىپ جاتىر. كۇدىكتىگە قاتىستى قىلمىستىق كودەكستىڭ ءۇش بابى بويىنشا ايىپ تاعىلىپ وتىر:
كەپىلگە الۋ – ق ر ق ك- نىڭ 261-بابى 2-بولىگى 4-تارماعى؛
قارۋ قولدانۋ ارقىلى جاسالعان بۇزاقىلىق – ق ر ق ك- نىڭ 293-بابى 3-بولىگى؛
تەرروريزم اكتىسى تۋرالى كورىنەۋ جالعان حابارلاۋ – ق ر ق ك- ءنىڭ 273-بابى.
الدىن الا تىڭداۋ كەزىندە پروكۋرور ايىپتاۋ اكتىسىن وقىدى. ءىس ماتەريالدارىنا سايكەس، 2025-جىلدىڭ 7-ناۋرىزىندا جۇمىسسىزدىق پەن جينالعان قارىزدارىنا بايلانىستى اۋىر ومىرلىك جاعدايعا تاپ بولعان م. باراتوۆ الماتى حالىقارالىق اۋەجايىنا اۆتوبۋسپەن كەلگەن. اۋەجاي اۋماعىندا ءبىراز ءجۇرىپ، ساعات 11:00 شاماسىندا عيماراتقا كىرگەن جانە ەكىنشى قاباتقا كوتەرىلىپ، جولاۋشىلاردى تىركەۋ زالىنا وتكەن.
- باراتوۆ جولاۋشىلاردىڭ ۇشۋعا دەيىنگى تەكسەرۋدەن ءوتىپ، كۇتۋ زالىنا كىرىپ جاتقانىن كورگەن. ءسويتىپ ءوزى دە باسقا قالاعا ۇشا الامىن دەپ ويلاپ، جولاۋشىلارمەن بىرگە تەكسەرۋ بەكەتىنە بارعان. سول جەردە ونى تەكسەرۋ قىزمەتىنىڭ ينسپەكتورى مۇحتاروۆا (جابىرلەنۋشى) توقتاتىپ، ءارى قاراي ءوتۋ ءۇشىن وتىرعىزۋ تالونى مەن جەكە كۋالىگىن كورسەتۋىن سۇراعان، - دەدى پروكۋرور.
ءىس ماتەريالدارىنان بەلگىلى بولعانداي، باراتوۆ وزىندە ەشقانداي قاجەتتى قۇجات جوق ەكەنىن ءتۇسىنىپ، تەكسەرۋشى ينسپەكتوردى كەپىلگە العان. ول بۇل ارەكەتى ارقىلى اۋەجاي قىزمەتكەرلەرىن ءوزىن ۇشاققا وتىرعىزۋعا ماجبۇرلەمەك بولعان.
- تەكسەرۋ قىزمەتىنىڭ ينسپەكتورى مۇحتاروۆانى شاشىنان تارتىپ، قوعامدىق ءتارتىپتى بۇزدى. وڭ جاق قالتاسىنان پىشاق الىپ شىعىپ، ونىمەن قورقىتتى. بۇل ارەكەتىمەن شەكتەلمەي، پوليتسيا قىزمەتكەرلەرى مەن باسقا ادامداردىڭ جينالىپ جاتقانىن كورىپ، باراتوۆ ينسپەكتوردى وزىنە «قالقان» ەتىپ پايدالاندى. پىشاقتى ونىڭ تاماعىنا تاقاعان كۇيى تالاپ قويدى: وزىنە جاقىنداماۋ، كۇش قولدانباۋ جانە قارۋدى تاستاۋ. ەگەر بۇل تالاپتار ورىندالماسا، اۋەجاي عيماراتىن جارىپ جىبەرەتىنىن ايتتى، - دەدى پروكۋرور.
ايىپتالۋشى ماشراپبەك باراتوۆ وقيعاعا بايلانىستى ءوز نۇسقاسىن ايتىپ بەردى. ونىڭ سوزىنشە، ول اۋەجايعا بارۋدى الدىن الا جوسپارلاماعان. قوعامدىق كولىكتە وتىرىپ اۋە ايلاعىنا قالاي جەتكەنىن بايقاماي قالعان.
ايىپتالۋشى تەكسەرۋ بەكەتىنە بارعاندا ينسپەكتور وزىنەن قۇجات سۇراعانىن، ال كەتپەك بولعانىندا ءوزىن جاعادان تارتقانىن اتاپ ءوتتى. ايتۋىنشا، ول اشۋ ۇستىندە قىزدى شاشىنان تارتقان جانە كۇندەلىكتى سومكەسىندە شۇجىق كەسۋ ءۇشىن الىپ جۇرەتىن پىشاقتى الىپ شىققان.
ماشراپبەك باراتوۆ ابىر-سابىر ۇستىندە «اۋەجايدى جارامىن» دەپ ايتقانىن مويىندادى. ءبىراق ايتۋىنشا، ەشكىمگە زيان كەلتىرۋگە نە اۋەجايدى جارۋعا نيەتى بولماعان.
ەسكە سالايىق، 7-ناۋرىز كۇنى الماتى اۋەجايىندا ەر ادام قىزدى كەپىلگە الىپ، كوپشىلىك الدىندا پىشاق كەزەنگەنىن جازعانبىز.
ابىروي بولعاندا، وقيعا قايعىلى اياقتالمادى. مۇسا ءابدىرايىم كۇدىكتىگە ءوزىن كەپىلگە ۇسىنىپ، قىزمەتكەردىڭ ورنىنا تۇرعان. ەر ادام ءتارتىپ ساقشىلارىمەن كەلىسسوزگە الاڭداعان تۇستا ول كۇدىكتىنىڭ قولىنداعى پىشاقتى جۇلىپ الدى.
بۇعان دەيىن الماتى اۋەجايىندا قىزدى كەپىلگە العان كۇدىكتىگە قاتىستى سوت باستالاتىنىن جازعانبىز.
