سوت ەمەس، سوتسىماققا اينالىپ بارادى: بيشىمبايەۆتىڭ ادۆوكاتى سۋديامەن داۋلاسىپ قالدى

استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەكس-مينيستر قۋاندىق بيشىمبايەۆقا قاتىستى سوت وتىرىسى تاراپتاردىڭ داۋ-دامايىنا ۇلاستى.

وسى رەتتە سۋديا ايجان قۇلبايەۆا سوت پروتسەسىن ۋاقىتشا توقتاتۋ جونىندە شەشىم قابىلدادى.

- مەن ءسىزدىڭ ارەكەتتەرىڭىزگە تاعى دا قارسىلىق بىلدىرۋگە ءماجبۇرمىن. ءسىز سوتتالۋشىنىڭ سويلەۋىنە، سۇراق قويۋىنا مۇمكىندىك بەرمەيسىز. بۇل ءبىرجاقتى پروتسەسس سياقتى. سوت ەمەس، سوتسىماققا اينالىپ بارادى. بارلىعى بيشىمبايەۆقا قارسى، - دەدى ەرلان عازىمجانوۆ سوتتا.

سۋديا ادۆوكاتتىڭ سوت وتىرىسى بارىسىندا بىرنەشە رەت ەسكەرتۋ الىپ، سوتقا قۇرمەتسىزدىك تانىتۋىنا بايلانىستى جەكە سوت قاۋلىسى شىعارىلاتىنىن مالىمدەدى.

سۋديا ايجان قۇلبايەۆا كەڭەسۋ بولمەسىنەن شىققاننان كەيىن تومەندەگىدەي مالىمدەمە جاسادى.

«اتالعان قىلمىستىق ءىس بويىنشا كاسىبي مىندەتتەرىن اتقارۋ كەزىندە ادۆوكات عازىمجانوۆقا قاتىستى جەكە قاۋلى شىعارىلدى. قاۋلى استانا قالاسى ادۆوكاتتار القاسىنىڭ ءتورالقاسىنا جولدانسىن. رەسپۋبليكالىق ادۆوكاتتار القاسى قاراۋ ناتيجەلەرى مەن قابىلدانعان شارالار تۋرالى ءبىر اي مەرزىمنەن كەشىكتىرمەي جەكە شەشىم شىعارعان سوتقا حابارلاسىن»، - دەدى سۋديا.

سونداي-اق، سۋديا الداعى ۋاقىتتا مۇنداي جاعدايلاردى بولدىرماۋ ءۇشىن پروتسەسكە قاتىسۋشىلار قىلمىستىق ءىس جۇرگىزۋ كودەكسىنىڭ نورمالارىن مۇلتىكسىز ورىنداۋعا، ەموتسيالارىن رەتتەۋگە جانە ءتوراعالىق ەتۋشىنىڭ بۇيرىعىنا باعىنۋعا ءتيىس ەكەنىن جەتكىزدى.