سپورت جارىسىنا قاتىساتىن بالانىڭ اتا- اناسىنان اقشا جيناۋ زاڭدى ما - ۆيتسە- مينيستر جاۋاپ بەردى

  ماجىلىستە بۇقارالىق جانە بالالار سپورتىن دامىتۋ ماسەلەسىنە ارنالعان ءىس- شارا ءوتتى.

جيىننان كەيىن تۋريزم جانە سپورت ۆيتسە- ءمينيسترى سەرىك جاراسبايەۆ جارىسقا قاتىساتىن بالانىڭ اتا- اناسىنان اقشا جيناۋ قانشالىقتى زاڭدى دەگەن سۇراققا جاۋاپ بەردى، دەپ حابارلايدى Kazinform.

«ونداي اقشا جيناۋ ارەكەتىن ءبىر سوزبەن زاڭدى نەمەسە زاڭسىز دەپ ايتا المايمىز. بۇل قاراجاتتى جەرگىلىكتى اتقارۋشى ورگاندار بەرىپ جاتىر. ەندى ونىڭ بالالارعا جەتۋىن ءبارىمىز بىرگە قامتاماسىز ەتۋىمىز كەرەك. سالا ماماندارىمەن قاتار قارجىلىق مونيتورينگ، قارجى نارىعىن رەتتەۋ جانە دامىتۋ اگەنتتىكتەرى دە بۇل ىسكە اتسالىسىپ جاتىر. اتا- انالار ءار وبلىستىڭ جارىسقا بولەتىن قارجىسىن ءبىلۋى كەرەك. ۇيىمداستىرۋشىلار جارىستىڭ قانداي شىعىندارىنا مەملەكەتتەن اقشا بولىنگەنىن اشىق كورسەتىپ، قاتىسۋشىلارعا سول مالىمەتتى ۇسىنىپ وتىرۋى كەرەك. مىسالى „ناۋرىز ايىندا مىنانداي جارىس بولادى. ول جارىسقا العاش بولىپ تىركەلگەن 26 ادامنىڭ شىعىنىنا اقشا بار“ دەپ الدىن الا حابارلاپ وتىرۋ قاجەت. ال قاتىسۋشىلار سانى 26 دان اسىپ بارا جاتسا، ولارعا باسقا جولدارىن قاراستىرۋ كەرەك»، - دەدى ول ب ا ق وكىلدەرىنىڭ ساۋالىنا بەرگەن جاۋابىندا.

ۆيتسە- مينيستر بۇل ماسەلەدە باستى جاۋاپكەرشىلىك - باپكەردىڭ موينىندا دەگەن پايىم ايتتى.

«اتا- انادان بۇرىن جارىستىڭ شىعىنىن كىم وتەيتىنىن جاتتىقتىرۋشى ءبىلۋى كەرەك. ال اتا- انا سول جاتتىقتىرۋشىدان سۇراپ، تالاپ ەتەدى. بۇل جەردە اتا- انا مەن جارىس ۇيىمداستىرۋشىنىڭ اراسىنداعى كوپىر - جاتتىقتىرۋشىلار. سوندىقتان اتا- انالار بۇكىل ماسەلەنى جاتتىقتىرۋشىدان سۇراپ، ءبىلىپ وتىرۋعا حاقىلى. بۇل جەردە نەگىزگى جاۋاپكەرشىلىك وسى جاتتىقتىرۋشىدا»، - دەدى سەرىك جاراسبايەۆ.