سومكەمدى جەرگە قويمايمىن!: قىتايلىق ايەل قىمبات اكسەسسۋار ءۇشىن رەيستى توقتاتىپ تاستاعان

استانا. قازاقپارات - ايەل بورتسەرىكتىڭ ءوتىنىشىن ورىنداماي، قىمبات اكسەسسۋاردى ەكونوم-كلاسستاعى بوس ورىنعا قويۋدى تالاپ ەتكەن.

قىتايدا ايەل Louis Vuitton برەندىنىڭ سومكەسىن ۇشاقتاعى ورىندىقتىڭ استىنا قويۋدان باس تارتىپ، رەيستى توقتاتىپ تاستادى. بۇل تۋرالى South China Morning Post باسىلىمى حابارلادى.

ايەل بورتسەرىكتىڭ ءوتىنىشىن ورىنداماي، قىمبات اكسەسسۋاردى ەكونوم-كلاسستاعى بوس ورىنعا قويۋدى تالاپ ەتكەن. جولاۋشى شامامەن ءبىر ساعات بويى ايتقانىنان قايتپاي قويعان. وسى ۋاقىت ىشىندە ۇشاق ۇشا الماي، ۇشۋ- قونۋ جولاعىنان كەرى قايتارىلىپ، قايتادان قونۋ ايماعىنا جەتكىزىلگەن. ءبىر ساعاتتىق داۋدان كەيىن پوليتسيا ايەلدى ۇشاقتان شىعارىپ جىبەردى.

China Express Airlines كومپانياسىنىڭ چۋڭچيڭنەن حىبي پروۆينسياسىنا ۇشاتىن رەيسىنە ساتىپ الىنعان بيلەت جولاۋشىعا شامامەن 800 يۋانعا (شامامەن 110 دوللار) تۇسكەن. ال Louis Vuitton سومكەسىنىڭ باعاسى 3000 دوللار شاماسىندا.

وقيعا قىتايدىڭ الەۋمەتتىك جەلىلەرىندە قىزۋ تالقىلاندى. كەيبىر ادامدار جولاۋشىنىڭ ەكيپاجدىڭ نۇسقاۋلارىنا باعىنباۋىن جانە قاۋىپسىزدىك تالاپتارىن ەلەمەۋىن سىنعا الدى. ال باسقالارى بورتسەرىكتىڭ بۇل جاعدايدى باسقاشا شەشە الاتىنىن اتاپ ءوتتى: ۇشۋدى توقتاتىپ، پوليتسيا شاقىرعانشا، ايەلگە سومكەسىن پاكەتكە سالۋدى ۇسىنۋى كەرەك ەدى دەپ پىكىر ءبىلدىردى.