سولتۇستىك قازاقستاندا سۋ تاسقىنى جاعدايى ءالى دە كۇردەلى – ت ج د

استانا. KAZINFORM - سولتۇستىك قازاقستان وبلىسىندا 1648 ۇيگە سۋ كىردى جانە بىرنەشە كۇندە ەسىل وزەنىندەگى سۋ دەڭگەيى تومەندەيدى دەپ كۇتىلۋدە. بۇل تۋرالى وبلىستىق ت ج د باسپا ءسوز حاتشىسى ەۆگەني جۋراۆليەۆ ايتىپ بەردى.

«قازىرگى ۋاقىتتا اپاتتى جويۋ بويىنشا جۇمىستار جۇرگىزىلۋدە، بۇگىن پەتروپاۆل قالاسىنا اۋىز سۋ بەرىلەدى. اسىرەسە ەرىكتىلەر كوپ كومەك كورسەتەدى، اۋىز سۋ باسقا قالالاردان دا اكەلىنىپ جاتىر. كەي جەرلەردە تەحنيكالىق سۋ بەرىلدى. پەتروپاۆلدا ەلەكتر جارىعى بار»، - دەدى ە. جۋراۆليەۆ رەسپۋبليكالىق اقپاراتتىق شتابتا وتكەن بريفينگتە.

ونىڭ ايتۋىنشا، جالپى وبلىستاعى جاعداي ءالى دە كۇردەلى بولىپ قالۋدا.

«سەرگەيەۆ سۋ قويماسى %159 تولىپ، سۋ بوگەت شەگىنەن 3 مەتر 10 سانتيمەتردەن استى. تاۋلىك ىشىندە 40 سانتيمەتر تومەندەۋ بايقالادى. ارينە، بۇل ءبىر اپتا بۇرىنعى كورسەتكىشتەردەن ايتارلىقتاي تومەن، ول كەزدە تىركەلگەن رەكوردتىق كورسەتكىش 4 مەتردەن اسقان ەدى. بىرنەشە كۇندە پەتروپاۆل قالاسىندا سۋ ازايادى دەپ كۇتىلۋدە»، - دەدى سپيكەر.

قازىرگى ساتتە وبلىستا 1648 ءۇيدى جانە 1115 ءۇي ماڭىنداعى اۋماقتاردى سۋ باسقان.

نەگىزگى سوققى قىزىلجار اۋدانىنىڭ تەپليچنوە، زاتون، پريبرەجنوە كەنتتەرىنە كەلدى، وندا 513 ءۇيدى سۋ باسىپ، 2203 ادام ەۆاكۋاتسيالاندى.

«پەتروپاۆل قالاسىنىڭ حرومزاۆود جانە ويقالا شاعىن اۋداندارىندا تاۋلىك ىشىندە 1010 ءۇيدى سۋ باستى. ولاردان 4552 ادام ەۆاكۋاتسيالاندى، ولاردىڭ 957 ءسى بالا. كوشىرىلگەن ادامدار وبلىس ورتالىعىنىڭ 3 ورتا مەكتەبى مەن كوللەدجدەردىڭ جاتاقحانالارىندا جانە دە باسىم بولىگى تۋىستارىندا ورنالاستىرىلدى»، - دەيدى ت ج د وكىلى.

ەسىل وزەنىنىڭ ماڭىنداعى ەلدى مەكەندەردەن كوشىرىلگەندەر وبلىس ورتالىعى مەن اۋداندارداعى 19 ەۆاكۋاتسيا پۋنكتتەرىنە ورنالاستىرىلدى.

جالپى وبلىس بويىنشا 7354 ادام ەۆاكۋاتسيالاندى، ولاردىڭ 1840 بالا. تاۋلىك ىشىندە 3684 ادام ەۆاكۋاتسيالاندى، ولاردىڭ 709 ى بالا. 44 ادام ۇيلەرىنە ورالدى.

سونىمەن بىرگە، 3530 باس مال قاۋىپسىز جەرلەرگە كوشىرىلدى.