سولتۇستىك قازاقستاندا قىلمىستىق اتقارۋ جۇيەسى دەپارتامەنتىنىڭ باستىعى ۇستالدى
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى سولتۇستىك قازاقستان وبلىسىنىڭ قىلمىستىق اتقارۋ جۇيەسى دەپارتامەنتىنىڭ باستىعى جەمقورلىق كۇدىگىمەن ۇستالعانىن راستادى.
«سىبايلاس جەمقورلىققا قارسى قىزمەت سولتۇستىك قازاقستان وبلىسى بويىنشا قىلمىستىق اتقارۋ جۇيەسى دەپارتامەنتىنىڭ باستىعى سوتقا دەيىنگى تەرگەۋ شارالارى اياسىندا ۇستالعانىن راستايدى. كەيىن قوسىمشا اقپارات بەرەمىز» دەلىنگەن اگەنتتىكتىڭ رەسمي مالىمەتىندە.
ەسكە سالا كەتەيىك، بۇل قىزمەتتى 2023-جىلدىڭ مامىرىنان بەرى ادىلەت مۇستافينوۆ اتقارىپ كەلە جاتىر.
ادىلەت مۇستافينوۆ 52 جاستا، سەمەي قالاسىندا دۇنيەگە كەلگەن.
1994-جىلى ومبى اگرارلىق ۋنيۆەرسيتەتىن «زووتەحنيك» ماماندىعى بويىنشا، 2007-جىلى قازاق قۇقىقتانۋ جانە حالىقارالىق قاتىناستار ينستيتۋتىن «قۇقىقتانۋ» ماماندىعى بويىنشا بىتىرگەن.
ءار جىلدارى پاۆلودار وبلىسى بويىنشا سالىق پوليتسياسى كوميتەتى باسقارماسىنىڭ پاۆلودار ءوڭىرى بويىنشا اۋدانارالىق ءبولىمىنىڭ ينسپەكتورى، پاۆلودار وبلىسى بويىنشا ق ا ج دەپارتامەنتىنىڭ وزىندىك قاۋىپسىزدىك توبىنىڭ ىشكى ىستەر ءبولىمىنىڭ اعا جەدەل ۋاكىلى، ق ر ءى ءى م ق ا ج ك قۇقىق قورعاۋ ورگاندارىمەن ءوزارا ءىس-قيمىل جەدەل باسقارۋ باستىعىنىڭ ورىنباسارى، سولتۇستىك قازاقستان وبلىسى، استانا قالاسى بويىنشا ق ا ج دەپارتامەنتى باستىعىنىڭ ورىنباسارى قىزمەتتەرىن اتقاردى.
وسى تاعايىنداۋعا دەيىن پاۆلودار وبلىسىندا قىلمىستىق-اتقارۋ جۇيەسى دەپارتامەنتىن باسقاردى.
