سولتۇستىك قازاقستان مەن قىتاي اراسىنداعى سىرتقى ساۋدا اينالىمى ءۇش جىلدا 2,2 ەسە ءوستى
پەتروپاۆل. KAZINFORM - سولتۇستىك قازاقستان وبلىسىندا قىتاي ەت قاۋىمداستىعىنىڭ دەلەگاتسياسى بولدى. كەزدەسۋدە ءوزارا ءتيىمدى ىنتىماقتاستىق ماسەلەلەرى تالقىلانىپ، اۋىل شارۋاشىلىعى ونىمدەرىن قايتا وڭدەۋ سالاسىندا بىرلەسكەن جوبالاردى جۇزەگە اسىرۋ ۇسىنىلدى.
بۇل تۋرالى س ق و اكىمى عاۋەز نۇرمۇحامبەتوۆ الەۋمەتتىك جەلىدەگى پاراقشاسىندا جازدى.
«ەت يمپورتتاۋشىلار مەن ەكسپورتتاۋشىلار كلۋبىنىڭ پرەزيدەنتى ما گۋانشەن باستاعان قىتاي ەت قاۋىمداستىعىنىڭ دەلەگاتسياسى كەشە قازاقستان-قىتاي ىسكەرلىك كەڭەسىنىڭ VII وتىرىسىنا قاتىستى. بۇل كەزدەسۋ ش ى ۇ سامميتىندە ەكى مەملەكەت باسشىلارىنىڭ اراسىنداعى كەلىسىمدەرگە قول جەتكىزۋ اياسىندا ءوتتى.
ايماقتا قازىردىڭ وزىندە «ايتسزيۋ» كورپوراتسياسىنىڭ اگروونەركاسىپتىك كلاستەرىن دامىتۋ بويىنشا قازاقستان-قىتاي جوباسى ءساتتى جۇزەگە اسۋدا - «تايىنشا-ماي» مايلى داقىلداردى وڭدەۋ زاۋىتى ىسكە قوسىلدى. سونداي-اق «مەموليۋكس» ديىرمەنى مەن قوسپاجەم زاۋىتى سالىنىپ جاتىر»، - دەدى عاۋەز نۇرمۇحامبەتوۆ.
ءوڭىر باسشىسىنىڭ ايتۋىنشا، قىتاي دەلەگاتسياسى «ەمس-اگرو» ەت كومبيناتىندا بولىپ، شوشقا كەشەنىن 200 مىڭ باسقا دەيىن كەڭەيتۋ جانە ەت ءوندىرۋ كولەمىن 20 مىڭ تونناعا جەتكىزۋ جوباسىمەن تانىستى.
«جالپى، س ق و مەن قىتاي اراسىنداعى ىنتىماقتاستىق ءوز جەمىسىن بەرىپ جاتقانىن ايتا كەتكەن ءجون. نەبارى 3 جىلدىڭ ىشىندە سىرتقى ساۋدا اينالىمى 2,2 ەسە ءوسىپ، 117 ميلليون ا ق ش دوللارىن قۇرادى.
ساپار قورىتىندىسى بويىنشا سولتۇستىك قازاقستان مەن قىتاي اراسىنداعى ىسكەرلىك جانە دوستىق قارىم-قاتىناس ۇزاق مەرزىمدى ءارى جەمىستى بولاتىنىنا سەنىم بىلدىردىك»، - دەپ جازدى عاۋەز نۇرمۇحامبەتوۆ.
بۇعان دەيىن استانادا قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستانعا مەملەكەتتىك ساپارى اياسىندا ق ر پرەزيدەنتىنىڭ تەلەراديوكەشەنى مەن قىتاي مەدياكورپوراتسياسى (CMG) ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويعانىن جازعان ەدىك.
