ۇستازىن بالاعاتتاعان نازاربايەۆ مەكتەبىنىڭ وقۋشىسى وقۋ ورنىنان شىعارىلدى

الماتى. KAZINFORM - الەۋمەتتىك جەلىدە قىزۋ تالقىلانعان ن ز م وقۋشىسىنىڭ مۇعالىمدى بالاعاتتاۋ وقيعاسىنا بايلانىستى «نازاربايەۆ زياتكەرلىك مەكتەپتەرى» د ب ب ۇ باسقارما ءتوراعاسى ءانۋار جانعوزين رەسمي مالىمدەمە جاسادى.

ونىڭ ايتۋىنشا، الماتى قالاسىنداعى نازاربايەۆ زياتكەرلىك مەكتەبىندە بولعان جاعدايعا بايلانىستى وقۋشىمەن، اتا-انالارمەن جانە پەداگوگيكالىق ۇجىممەن كەزدەسۋ وتكەن. تالقىلاۋعا وقۋ-اعارتۋ مينيسترلىگىنىڭ وكىلدەرى، وڭىرلىك بالا قۇقىقتارى جونىندەگى ۋاكىل مەن قوعامدىق كەڭەستىڭ مۇشەلەرى دە قاتىسقان.

- كەزدەسۋ بارىسىندا بۇعان دەيىن قابىلدانعان شەشىم قايتا قارالىپ، تاراپتار ءوزارا تۇسىنىستىككە كەلدى. نازاربايەۆ زياتكەرلىك مەكتەبى ءوز شەشىمىن وزگەرتپەيدى، وقۋشى مەكتەپتەن شىعارىلىپ، مەملەكەتتىك جالپى ءبىلىم بەرەتىن مەكتەپكە اۋىستىرىلدى. وقۋشىنىڭ اتا-اناسى تاراپىنان ەشقانداي قارسىلىق جوق. نازاربايەۆ زياتكەرلىك مەكتەپتەرى شاكىرتتەرگە ءاردايىم قۇرمەتپەن قاراپ، قولداۋ كورسەتۋدى جانە ءوزارا سىيلاستىققا نەگىزدەلگەن سىندارلى قارىم-قاتىناستى باستى قاعيدا رەتىندە ۇستانادى، - دەدى ءانۋار جانعوزين.

وقۋ-اعارتۋ ءمينيسترىنىڭ باسپا ءسوز قىزمەتى دە بولعان جاعداي جان- جاقتى زەردەلەنىپ، بالانىڭ ءارى قاراي ءبىلىم الۋ جولدارى قاراستىرىلعانىن حابارلادى.

- بۇل رەتتە شەشىم زاڭناما تالاپتارىنا ساي، بالانىڭ قۇقىقتارى مەن مۇددەلەرىن، ونىڭ ىشىندە تولىققاندى ءبىلىم الۋ قۇقىعىن ەسكەرە وتىرىپ قابىلداندى، - دەلىنگەن ۆەدومستۆو مالىمدەمەسىندە.

ەسكە سالايىق، نازاربايەۆ زياتكەرلىك مەكتەبى جوعارى سىنىپ وقۋشىسى ەمتيحان كەزىندە ءوزىن تەلەفونمەن ۇستاپ العان مۇعالىمگە بالاعات ءسوز ايتقان. سوندىقتان مەكتەپ باسشىلىعى وقۋشىنى ءبىلىم ورداسىنان شىعارۋ تۋرالى شەشىم قابىلدادى. بۇل ماسەلە قوعامدا قىزۋ تالقىلاندى. ىسكە وقۋ- اعارتۋ مينيسترلىگى ارالاسىپ، الماتى قالاسىنا بالالاردىڭ قۇقىقتارىن قورعاۋ كوميتەتىنىڭ ءتوراعاسى شۇعىل تۇردە ىسساپارمەن كەلدى.

بۇعان دەيىن الماتىدا 670 تۇلەك «التىن بەلگىگە» ۇمىتكەر ەكەنىن جازعانبىز.

اۆتور

دوسبول اتاجان