سەمەيدە جول ۇستىندە كولىگىن توقتاتىپ، بي بيلەگەن 4 جۇرگىزۋشى جاۋاپقا تارتىلدى
سەمەي. KAZINFORM - سەمەي قالاسىندا 4 كولىك جۇرگىزۋشىسى جول ۇستىندە بي بيلەگەنى ءۇشىن اكىمشىلىك جاۋاپكەرشىلىككە تارتىلدى.
سەمەيدە «Hyundai Sonata» ،«Chevrolet Cobalt» ،«Hyundai Elantra» جانە «Lada 2172» اۆتوكولىكتەرىنىڭ 19 جاستاعى ءتورت جۇرگىزۋشىسى جول بويىندا بي بيلەپ، چەللەندج وتكىزگەن. بۇل ارەكەت ۇلكەن قوعامدىق نارازىلىق تۋدىرىپ، پوليتسيانىڭ نازارىن اۋداردى.
اباي وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، جاستار پوليتسيا بولىمشەسىنە شاقىرىلدى.
«ءتارتىپ ساقشىلارى ولارعا جولدا ءتۇرلى چەللەندجدەر وتكىزۋ سياقتى ءىس-ارەكەتتەردىڭ قاۋىپتىلىگىن ايتتى. جاستارعا مۇنىڭ اۋىر زارداپتارعا، سونىڭ ىشىندە اپاتتار مەن جاراقاتتارعا اكەلۋى مۇمكىن ەكەندىگى ءتۇسىندىرىلدى»، - دەلىنگەن اقپاراتتا.
سونىمەن قاتار پوليتسيا ءتورت جۇرگىزۋشىنى جول قوزعالىسى ەرەجەلەرىنىڭ تالاپتارىن بۇزعانى، ساعات 22.00-دەن تاڭعى 9.00-گە دەيىن تىنىشتىقتى بۇزعانى ءۇشىن ەكى باپ بويىنشا اكىمشىلىك جاۋاپكەرشىلىككە تارتتى.
اۆتور
تالعاتجان مۇحامەتبەك ۇلى
