سەمەيدە الاياق حالىقتى 63 ميلليون تەڭگەگە الداپ، اقشانى قۇمار ويىنعا سالعان
سەمەي. KAZINFORM - سەمەي قالاسىندا حالىقتى 63 ميلليون تەڭگەگە الداپ، اقشانى قۇمار ويىنعا سالعان ەر ادام سوتتالدى.
پوليسيا قىزمەتكەرلەرىنە الاياقتىڭ قۇربانى بولعان 32 تۇرعىن جۇگىندى. وتىرىك سوزگە سەنىپ قالعان جابىرلەنۋشىلەر ەر ادامنىڭ قارىزعا دەپ سۇراعان اقشاسىن بەرە سالعان.
وسىلايشا، الاياق جابىرلەنۋشىلەردەن 250 مىڭ تەڭگەدەن 11 ميلليون تەڭگەگە دەيىن اقشا الىپ كەلدى.
سونىڭ سالدارىنان ازاماتتارعا كەلتىرىلگەن جالپى شىعىن كولەمى 63 ميلليون تەڭگەدەن اسقان.
«سەمەي قالالىق پ ب كريمينالدىق پوليسيا باسقارماسى مەن cyberpol ارنايى بولىمشەسىنىڭ قىزمەتكەرلەرى 35 جاستاعى كۇدىكتىنى ۇستادى. جاۋاپ الۋ كەزىندە ول كىناسىن مويىنداپ، اقشانى بۋكمەكەرلىك كەڭسەدە باسكە تىككەنىن جەتكىزگەن»، - دەپ حابارلادى اباي وبلىستىق پوليسيا دەپارتامەنتىنەن.
قالالىق سوت الاياقتىق جاساعان ەر ادامعا قاتىستى ۇكىم شىعاردى. سوت شەشىمىمەن سوتتالۋشى 3 جىل 2 ايعا باس بوستاندىعىنان ايىرىلدى.
ول جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەيدى.
