سلوۆاكيانىڭ پرەمەر-مينيسترىنە كىم وق اتتى

استانا. KAZINFORM - سلوۆاكيالىق ب ا ق ۇستالعان ادامنىڭ جەكە باسى تۋرالى مالىمەتتەردى جاريالادى. ول سلوۆاكيانىڭ باتىسىندا ورنالاسقان لەۆيتسا قالاسىنىڭ 71 جاستاعى تۇرعىنى يۋراي سينتۋلا بولىپ شىقتى.

سلوۆاكيا پرەمەر-ءمينيسترى روبەرت فيسوعا شابۋىل جاساعان ادام وقيعا ورنىندا دەرەۋ ۇستالدى. حابارلانعانداي، شابۋىلشى ساياساتكەرگە بەس رەت وق اتقان.

سلوۆاكيالىق JOJ تەلەارناسىنىڭ حابارلاۋىنشا، ۇستالعان ازامات يۋ. سينتۋلا 1953 -جىلى تۋعان. ول 2005 -جىلى «دۋگا» ادەبي كلۋبىنىڭ نەگىزىن قالاۋشىلاردىڭ ءبىرى بولدى.

2016 -جىلعا دەيىن وسى ادەبي كلۋبتىڭ ءتوراعاسى بولىپ، ءۇش ولەڭ جيناعىن جازدى. 2015 -جىلدان باستاپ - سلوۆاكيا جازۋشىلارى قوعامىنىڭ مۇشەسى. JOJ 24 مالىمەتىنشە، 2016 -جىلى ول لەۆيتسا قالاسىنداعى ساۋدا ورتالىعىندا جۇرگىزۋشى بولىپ جۇمىس ىستەگەن.

شابۋىل جاساۋ ءۇشىن يۋراي سينتۋلا رەسمي تىركەلگەن قىسقا وقپاندى قارۋدى قولدانعان. ول قاماۋعا الۋ كەزىندە پرەمەر-ءمينيستردىڭ ساياساتىمەن كەلىسپەيتىنىن مالىمدەدى.

سلوۆاكيانىڭ ىشكى ىستەر ءمينيسترى ماتۋش شۋتاي ەشتوكتىڭ ايتۋىنشا، بۇل ساياسي استارلى ارەكەت ەكەنى انىق. باس پروكۋرور ماروش جيلينكا قۇقىق قورعاۋ ورگاندارى پرەمەر-ءمينيستردىڭ اتىلۋىنا ىمىراسىز جاۋاپ بەرەتىنىن ايتتى.

سلوۆاكيا پرەزيدەنتى پرەمەر-مينيسترگە جاسالعان شابۋىلدى «دەموكراتياعا جاسالعان شابۋىل» دەپ اتادى.

شابۋىلدى تەك كورشى مەملەكەتتەردىڭ وكىلدەرى عانا ەمەس، ەۋروپالىق جانە الەمدىك كوشباسشىلار، سونىڭ ىشىندە ەۋروكوميسسيا پرەزيدەنتى ۋرسۋلا فون دەر ليايەن، ا ق ش پرەزيدەنتى دجو بايدەن، رەسەي پرەزيدەنتى ۆلاديمير پۋتين جانە قازاقستان پرەزدەنتى قاسىم-جومارت توقايەۆ ايىپتادى.

ر. فيسوعا جاسالعان شابۋىلدان كەيىن سلوۆاكيا پارلامەنتىنىڭ قازىرگى سەسسياسىنىڭ جۇمىسى بەلگىسىز مەرزىمگە توقتاتىلدى.

اۆتور
زارينا تۋعانبايەۆا