سۋعا شومىلۋ ماۋسىمى: ىشىمدىك ىشكەن 785 ادام جاۋاپقا تارتىلدى

استانا. KAZINFORM - ق ر ءى ءى م اكىمشىلىك پوليتسيا كوميتەتى باسقارما باستىعىنىڭ ورىنباسارى ايدىن ورازبايەۆ سۋ ايدىنىنداعى قاۋىپسىزدىك شارالارى تۋرالى ايتىپ بەردى.

جاز باستالىسىمەن جاپپاي دەمالىس ورىندارىندا جاساقتار كوبەيتىلدى. جەكە قۇرام ادامداردى سۋدان قۇتقارۋعا جانە ءبىرىنشى كومەك كورسەتۋ داعدىلارىنا ۇيرەتىلەدى. اۆتوپاترۋلدەر قۇتقارۋ شەڭبەرلەرىمەن، جيلەتتەرمەن، ارقاندارمەن جابدىقتالعان.

«ەلىمىزدە ءجۇزۋ، دەمالۋ جانە بالىق اۋلاۋ ءۇشىن پايدالانىلاتىن 85 مىڭ وزەن مەن 48 مىڭ كول بار. اكىمدەر شەشىمىمەن 708 بۇقارالىق دەمالىس ورنى، 167 كوممۋنالدىق جانە 425 جەكە جاعاجاي، 116 سپورت جانە تۋريزم ءۇشىن بەكىتىلگەن. سۋ ايدىندارىندا رەيدتەر مەن ءتۇسىندىرۋ جۇمىستارى جۇرگىزىلدى، جەدەل باسقارۋ ورتالىقتارى كامەرالارىمەن قامتىلدى»، - دەدى ا. ورازبايەۆ مينيسترلىك بريفينگىندە.

ناتيجەسىندە تىيىم سالىنعان جەرلەردە شومىلعانى ءۇشىن 1925 ادام جاۋاپقا تارتىلدى، الكوگولدىك ىشىمدىكتەردى ىشۋ نەمەسە قوعامدىق ورىندارعا ماساڭ كۇيدە كەلگەنى ءۇشىن - 785 ادام، ۇساق بۇزاقىلىق ءۇشىن - 475 ادام جازالاندى. سونداي-اق، پوليتسيا قىزمەتكەرلەرى سۋعا باتقان 14 ادامدى قۇتقارعان.

«سۋدا سپيرتتىك ىشىمدىك ىشۋگە بولمايدى، رۇقساتسىز جەرلەردە شومىلماۋ قاجەت، اسىرە بالالاردى قاراۋسىز قالدىرماۋدى سۇرايمىز. سەبەبى ادامداردىڭ سۋدا قايتىس بولۋلاردىڭ باستى سەبەبى قاۋىپسىزدىك شارالارىن ساقتاماۋ»، - دەيدى ءى ءى م وكىلى.

اۆتور
ايجان سەرىكجان قىزى