سۋعا ءتۇسۋ قاۋىپسىزدىگىن بۇزعاندارعا 62 ميلليون تەڭگەدەن استام ايىپپۇل سالىندى
استانا. KAZINFORM - ەلىمىزدە سۋداعى قاۋىپسىزدىكتى ساقتاماعانى ءۇشىن اكىمشىلىك جاۋاپكەرشىلىككە تارتىلعاندار سانى 7 ەسە ارتقان.
بۇل تۋرالى ت ج م ازاماتتىق قورعانىس جانە اسكەري بولىمدەر كوميتەتى ءتوراعاسىنىڭ ورىنباسارى اقىلبەك احمەتجانوۆ ءمالىم ەتتى.
«ىشكى ىستەر جانە كولىك مينيسترلىكتەرىمەن بىرلەسىپ سۋ ايدىندارىندا قاۋىپسىزدىكتى قامتۋ جانە ءولىمنىڭ الدىن الۋ ماقساتىندا 39853 رەيد پەن پاترۋلدەۋ جۇرگىزىلدى. زاڭ بۇزۋشىلىقتار اكىمشىلىك قۇقىق بۇزۋشىلىق تۋرالى كودەكسىنىڭ «ورتاق سۋ پايدالانۋ قاعيدالارىن بۇزعانى» 364، «سۋ ايدىندارىنداعى قاۋىپسىزدىك قاعيدالارىن بۇزۋ نەمەسە ورىنداماعانى» 412 جانە «الكوگولدىك ىشىمدىكتەر ءىشۋ نەمەسە قوعامدىق ورىنداردا ماس كۇيىندە بولعانى» ءۇشىن 440 - باپتارى بويىنشا اكىمشىلىك جاۋاپكەرشىلىك قاراستىرىلعان. جىل باسىنان بەرى زاڭ بۇزۋشىلارعا جالپى سوماسى 62 ميلليون 608 مىڭ تەڭگەدەن اساتىن سوماداعى ايىپپۇلعا 9 مىڭعا جۋىق حاتتاما تولتىرىلدى»، - دەدى اقىلبەك احمەتجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، بيىل اكىمشىلىك قۇقىقبۇزۋشىلىق تۋرالى كودەكستىڭ 412-بابى بويىنشا «سۋداعى قاۋىپسىزدىكتى ساقتاماعاندارى ءۇشىن» اكىمشىلىك جاۋاپكەرشىلىككە تارتىلعاندار سانى 7 ەسە ۇلعايعان.
بۇعان دەيىن ت ج م وكىلى ەلىمىزدەگى قۇتقارۋشىلار سانىنا قاتىستى پىكىر بىلدىرگەن ەدى.
ايتا كەتەيىك، بيىل شومىلۋ ماۋسىمى باستالعالى 70 ادامنىڭ اجالى سۋدان كەلگەن. ونىڭ ىشىندە 30 بالا بار.
