سايرام- وگەم ۇلتتىق پاركىندە فوتوتۇزاققا سيرەك كەزدەسەتىن جانۋارلار ىلىكتى
استانا. KAZINFORM - «سايرام- وگەم» مەملەكەتتىك ۇلتتىق تابيعي پاركىنىڭ اۋماعىندا ورناتىلعان فوتوتۇزاقتارعا سيرەك كەزدەسەتىن جابايى جانۋارلار - تۇركىستان سىلەۋسىنى، ءۇندى جايراسى، قاسقىر جانە ءسىبىر ەلىگى ءتۇسىپ قالدى.
بۇل كادرلار قازاقستاننىڭ وڭتۇستىگىندە مەكەندەيتىن جانۋارلار الەمىنىڭ الۋان تۇرلىلىگىن تاعى ءبىر مارتە دالەلدەيدى.
ۇلتتىق پارك قىزمەتكەرلەرىنىڭ ايتۋىنشا، فوتوتۇزاقتار تەك جانۋارلاردى بەينەجازباعا ءتۇسىرىپ قانا قويماي، ولاردىڭ قاۋىپسىزدىگىن قامتاماسىز ەتۋگە دە كومەكتەسەدى. قىس مەزگىلىندە بيوتەحنيكالىق ءىس-شارالار كۇشەيتىلىپ، جابايى اڭدارعا جەم-ءشوپ قورى دايىندالدى.
ايتا كەتۋ كەرەك «سايرام-وگەم» م ۇ ت پ اۋماعىندا بارلىق اڭشىلىق تۇرىنە قاتاڭ تىيىم سالىنعان. جانۋارلار پوپۋلياتسياسىن ساقتاۋ ماقساتىندا تۇراقتى تۇردە تابيعات قورعاۋ شارالارى جۇرگىزىلىپ جاتىر.
باياناۋىل مەملەكەتتىك ۇلتتىق تابيعي پاركى اۋماعىندا ورمان شەبەرى ارىن تۇنگى ۋاقىتتا جول جيەگىندە سىلەۋسىننىڭ قويان اۋلاۋ ءساتىن بايقاپ، سيرەك كەزدەسەتىن كادرلاردى ءتۇسىرىپ العان.
سىلەۋسىن (Lynx lynx) - سۇتقورەكتىلەر كلاسى جارتقىشتار وتريادىنىڭ مىسىقتار تقىمداسىنا جاتاتىن جىرتقىش اڭ. سىلەۋسىن تاۋلى القاپتاردىڭ قىلقان جاپىراقتى جانە جالپاق جاپىراقتى ورمان وسكەن بەلدەۋلەرىندە تارالعان. دەنەسىنىڭ ۇزىندىعى 87-104 س م، سالماعى 13,2-23,2 ك گ. سىلەۋسىننىڭ دەنەسى مىعىم، باسى جۇمىر، ءۇشبۇرىشتى قۇلاقتارىنىڭ ۇشىندا ايقىن كورىنەتىن قارا شاشاقتى شوقتارى بولادى.
2024 -جىلعى ساناق بويىنشا، باياناۋىل ۇلتتىق پاركىنىڭ اۋماعىندا 42 سىلەۋسىن مەكەندەيدى.
سونىمەن قاتار باتىس- التاي قورىعىنىڭ مەملەكەتتىك ينسپەكتورلارى اۋماقتى ارالاۋ كەزىندە بۇلعىندى ۆيدەوعا ءتۇسىرىپ الدى.
بۇلعىن (لات. Martes zibellina) - سۋسارلار تۇقىمداسىنىڭ سۋسارلار تۋىسىنا جاتاتىن جىرتقىش سۇتقورەكتى اڭ.
دەنە تۇرقى 40 - 55 س م، قۇيرىعى - 20 س م-دەي، سالماعى 0,4 - 1,6 ك گ. قازاقستاندا التايدىڭ قىلقان جاپىراقتى ورماندارىندا كەزدەسەدى.
ۇساق جاندىكتەرمەن، كەمىرگشتەرمەن، تيىنمەن، قويانمەن، بالقاراعاي جاڭعاعىمەن، جيدەكپەن قورەكتەنەدى. شىرشالى، بالقاراعايلى ورماندارداعى اعاش دىڭدەرى مەن تاس قۋىستاردى مەكەندەيدى.
ايتا كەتەلىك قوستانايدا سيرەك كەزدەسەتىن جانۋارلاردى اۋلاۋمەن اينالىسقان براكونەرلەر ۇستالعان ەدى.
اۆتور
نازىم بولەسوۆا
