سارايشىقتا ارحەولوگيالىق قازبا جۇمىسى باستالدى
اتىراۋ. KAZINFORM - اتىراۋ وبلىسىنىڭ ەكى اۋدانىندا ارحەولوگيالىق قازبا جۇمىسى باستالدى. ونىڭ ءبىرى قىزىلقوعا اۋدانىنداعى قاراباۋ، ەكىنشىسى ماحامبەت اۋدانىنىڭ سارايشىق اۋىلىندا ءجۇرىپ جاتىر.
اتىراۋ وبلىستىق تاريحي- ولكەتانۋ مۋزەيى جانىنان قۇرىلعان ەكسپەديتسيا قىزىلقوعا اۋدانىنداعى قاراباۋ اۋىلىنا كەلدى.
ەكسپەديتسياعا تاريح عىلىمدارىنىڭ كانديداتى مارات قاسەنوۆ جەتەكشىلىك ەتەدى.
مۋزەيدىڭ ۇسىنعان اقپاراتىنا قاراعاندا، ارحەولوگيالىق قازبا جۇمىسى بيىلعى جوسپارعا سايكەس قولعا الىنىپ وتىر.
«اتىراۋ وبلىستىق تاريحي-ولكەتانۋ مۋزەيى ماۋسىم-تامىز ايلارىندا قىزىلقوعا اۋدانىنىڭ قاراباۋ اۋىلى ماڭىنداعى ەرتە تەمىر ءداۋىرىنىڭ قاراباۋ-2 قورعانىنا ارحەولوگيالىق قازبا جۇمىستارىن جۇرگىزەدى. اتالعان قورعاننىڭ ديامەترى - 70 مەتر، ال، بيىكتىگى - 300 سانتيمەتر. قاراباۋ اۋىلىنان سولتۇستىك باتىسقا قاراي 8,5 شاقىرىم قاشىقتىقتا ورنالاسقان بىرنەشە قورعان بار»، - دەپ حابارلادى وبلىستىق مۋزەيدەن.
ال، سارايشىق اۋىلدىق وكرۋگىنىڭ اكىمى جانات كەنجەعالييەۆانىڭ ايتۋىنشا، سۋ تاسقىنى كەزىندە ارحەولوگيالىق قازبا ورىندارىنا زاقىم كەلمەگەن.
«قازىر جايىق وزەنىنىڭ جاعاسىنداعى تاريحي ورىندا قازبا جۇمىسى باستالدى. ارحەولوگيالىق جۇمىسىن جۇرگىزۋدى „سارايشىق“ مەملەكەتتىك تاريحي- مادەني مۋزەي- قورىعى» ر م ق ك- دان 3 ارحەولوگ، ح. دوسمۇحامەدوۆ اتىنداعى اتىراۋ ۋنيۆەرسيتەتىنەن 18 ستۋدەنت، باتىس قازاقستان وبلىسىنداعى ۋنيۆەرسيتەتتەن 22 ستۋدەنت قولعا الدى. قازبا جۇمىسى شىلدە ايىنا دەيىن جالعاسادى»، - دەيدى جانات كەنجەعاليەۆا.
ەسكە سالا كەتەلىك، بۇدان بۇرىن جايىق وزەنىنەن ورتاعاسىرلىق سارايشىق قالاشىعىنا قاتەر تونبەيتىنىن حابارلاعان ەدىك.
