«ساق ستيلىندەگى» بانكنوتا: كۇزدە جاڭا 10000 تەڭگەلىكتەر جاپپاي تارالادى
استانا. KAZINFORM – ق ر ۇلتتىق بانكى قولما-قول اقشا اينالىسى دەپارتمەنتى جوباسىنىڭ باس ديزاينەر-مامانى سانجار نۇرقاسىموۆ «ساق ستيلى» جاڭا سەرياسىنان نومينالى 10000 تەڭگەلىك بانكنوتالار ادامداردىڭ قولىنا قاشان تيەتىنىن ناقتىلادى.
بۇل «ساق ستيلى» جاڭا سەرياسىنان ەكىنشى بانكنوتا. ول قازاقى ويۋ-ورنەكتىڭ باستاۋ نەگىزى سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن «ساق ستيلى» ەلەمەنتتەرىنە نەگىزدەلگەن.
«بۇل جاڭا بانكنوتالار كۇزگە قاراي جاپپاي تارالادى. الداعى كۇندەرى اينالىمعا شىققاننان كەيىن، ەكىنشى دەڭگەيدەگى بانكتەر ونى اداپتاتسياعا الادى. ياعني بۇكىل كاسسالىق تەحنيكا، بانكوماتتار مەن تەرمينالدار جاڭا اقشاعا قاتىستى ءتيىستى بەيىمدەۋدەن وتكەننەن كەيىن، شامامەن قىركۇيەك ايىندا ەل حالقىنىڭ قولىنا تيەدى. جالپى، جاپپاي تارالىم بويىنشا ۇلتتىق بانك رەسمي جاريالايدى»، - دەدى س. نۇرقاسىموۆ.
اتاپ ايتقاندا، نومينالى 10000 تەڭگەلىك جاڭا بانكنوتالار 2024-جىلعى 28-ماۋسىمنان باستاپ اينالىمعا ەنەدى جانە اينالىمدا جۇرگەن 2012-جىلعى ۇلگىدەگى نومينالى 10000 تەڭگەلىك ۇلتتىق ۆاليۋتا بانكنوتالارىمەن (بۇدان ءارى - ەسكى ۇلگىدەگى بانكنوتا) ەكى جىل بويى اۋىستىرىلادى.
ياعني، ەسكى ۇلگىدەگى بارلىق بانكنوتا ەكى جىلدىڭ ىشىندە اينالىمنان بىرتىندەپ الىنادى. تيىسىنشە، بانكنوتالار اينالىمدا قاتار جۇرگەن ۋاقىتتا حالىققا ەسكى ۇلگىدەگى بانكنوتالاردى ەكىنشى دەڭگەيلى بانكتەردەگى نەمەسە قۇب فيليالدارىنداعى جاڭا بانكنوتالارعا ايىرباستاۋدىڭ قاجەتى جوق. جاڭا جانە ەسكى ۇلگىدەگى بانكنوتالاردىڭ اينالىمدا قاتار ءجۇرۋ كەزەڭى 2024-جىلدىڭ 28-ماۋسىمنان 2026-جىلدىڭ 28-ماۋسىمىنا دەيىنگى ارالىقتى قامتيدى.
