سالتانات نۇكەنوۆانىڭ ءولىمىن تىركەگەن جەدەل جاردەم قىزمەتكەرى سوتتا نە ايتتى
استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سالتانات نۇكەنوۆانىڭ ءولىمىن انىقتاعان جەدەل جاردەم دارىگەرى نۇرلان مۇحامبەدەنوۆ جاۋاپ بەرىپ جاتىر.
ونىڭ ايتۋىنشا، 2023-جىلى 9-قاراشا كەشكى ساعات 19:55 تە BAU مەيرامحاناسىنان قوڭىراۋ تۇسكەن.
وندا ايەلدىڭ ەس-ءتۇسسىز، دەم الماي جاتقانى ايتىلعان. جەدەل جاردەم 8 مينۋتتا وقيعا ورنىنا جەتكەن.
«مەنىڭ قاسىمدا جۇرگىزۋشى جانە كومەكشىم بولدى، ۇشەۋمىز رەانيماتسيالىق بريگادا رەتىندە مەيرامحاناعا كىردىك. ءبىزدى ايىپتالۋشى بايجانوۆ سىرتتا كۇتىپ الدى جانە 2-قاباتتاعى VIP بولمەگە الىپ كەلدى. جول بويى سويلەسكەن جوقپىز. ديۆاندا جالاڭاش دەنەسى كورپەمەن جابىلعان ايەل جاتتى. ءمايىت قۇساتىپ بەتىنە دەيىن كورپەمەن جاۋىپ تاستاعان. ونى ەدەنگە ءتۇسىرىپ، جۇرەك-وكپە رەانيماتسياسىن باستادىق»، - دەدى ن. مۇحامبەدەنوۆ.
جەدەل جاردەم دارىگەرى پاتسيەنتتىڭ پۋلسى سوقپاعانىن، تىنىسى مەن جۇرەك قاعىسى دا توقتاعانىن اتاپ ءوتتى. تەرىسى سالقىن تارتقان جانە بوزارعان، كوزىنىڭ قاراشىقتارى ۇلكەيگەن.
«كوزگە كورىنەتىن دەنە زاقىمى رەتىندە بەت، مۇرىن گەماتوماسىن، يەكتەگى سوققىلاردى، سونداي-اق جامباسىنداعى جاراقات پەن بالتىرىنداعى گەماتومانى ايتۋعا بولادى. كوزىنىڭ اينالاسى، قولى يىقتان تومەن كوگەرگەن. بايجانوۆ بىزگە مارقۇمنىڭ پاسپورتتىق دەرەكتەرىن بەردى. ءبىز دەنە جاراقاتى مەن ءولىم جاعدايى جونىندە 102 گە حابارلادىق. سودان كەيىن پوليتسيا، اعا لەيتەنانت مارچەنكو كەلدى. ءمايىتتى تاپسىرىپ، ساعات 22:39 دا شىقتىق»، - دەدى دارىگەر.
سونىمەن بىرگە، كۋاگەر بيشىمبايەۆ پەن بايجانوۆتان وقيعانىڭ سەبەبى مەن انامنەزىن سۇراعانىن، ءبىراق ءتيىستى جاۋاپ الا الماعانىن جەتكىزدى.
ەكەۋىنىڭ اڭگىمەسى كەدەرگى كەلتىرگەندىكتەن دارىگەر ولاردىڭ سىرتقا شىعۋىن سۇراعان.
