ساۋدا جانە ەكولوگيالىق قاۋىپسىزدىك: قىتاي مەن ورتالىق ازيا مينيسترلەرى الماتىدا نەنى تالقىلادى
الماتى. KAZINFORM - الماتىدا سىرتقى ىستەر مينيسترلەرىنىڭ «ورتالىق ازيا - قىتاي» فورماتىنداعى VI كەزدەسۋى اياقتالدى.
شاراعا قازاقستاننىڭ سىرتقى ىستەر ءمينيسترى مۇرات نۇرتىلەۋ، قىتاي سىرتقى ىستەر ءمينيسترى ۆان ي، قىرعىزستان سىرتقى ىستەر ءمينيسترى جەەنبەك كۋلۋبايەۆ، تاجىكستان سىرتقى ىستەر ءمينيسترى سيرودجيددين مۋحريددين، وزبەكستان سىرتقى ىستەر ءمينيسترى باحتيەر سايدوۆ جانە تۇرىكمەنستان وكىلى قاتىستى.
كەزدەسۋدە ساياسي ديالوگتى نىعايتۋعا، ساۋدا- ەكونوميكالىق بايلانىستاردى كەڭەيتۋگە، كولىكتىك ءوزارا بايلانىستى دامىتۋعا، سىن-تەگەۋرىندەر مەن قاۋىپ-قاتەرلەرمەن بىرلەسكەن كۇرەسكە، سونداي-اق وڭىردەگى ورنىقتى دامۋ مەن ەكولوگيالىق قاۋىپسىزدىك ماسەلەلەرىنە باستى نازار اۋدارىلدى. ورتالىق ازيانىڭ قىتايمەن ءوزارا سىيلاستىق پەن تەڭدىك قاعيداتتارىندا كوپجاقتى ءوزارا ءىس-قيمىلىنىڭ ارحيتەكتۋراسىن جاقسارتۋ بويىنشا ۇسىنىستار تالقىلاندى.
تاراپتار قازىرگى زامانعى سىن-تەگەۋرىندەرگە تەڭدەستىرىلگەن كوزقاراستاردىڭ قاجەتتىلىگىن اتاپ ءوتىپ، ءوزارا ءتيىمدى دامۋ جولىنداعى قادامداردى كەلىستى.
م. نۇرتىلەۋ ءوز سوزىندە وڭىردەگى تۇراقتىلىقتى قامتاماسىز ەتۋ ءۇشىن نەگىزگى سالالارداعى ىنتىماقتاستىقتى ودان ءارى كەڭەيتۋ قاجەتتىگىنە نازار اۋدارا وتىرىپ، «ورتالىق ازيا - قىتاي» كوپجاقتى فورماتىن نىعايتۋدىڭ ماڭىزدىلىعىن اتاپ ءوتتى.
- فورماتىمىزدىڭ «ورتالىق ازيا +» تەتىكتەرى اراسىندا فلاگمانعا اينالۋى، ال كوشباسشىلاردىڭ الداعى كەزدەسۋى ماڭگىلىك دوستىق پەن وركەندەۋدىڭ جاڭا كەزەڭىن اشۋى ءۇشىن بارلىق جاعداي جاسالىپ جاتىر، - دەدى قازاقستان ءسىم باسشىسى.
وتىرىسقا قاتىسۋشىلار جاھاندىق سىن-قاتەرلەر جاعدايىندا سىندارلى ديالوگتى جالعاستىرۋدىڭ، بايلانىستاردى دامىتۋدىڭ جانە باسىم باعىتتار بويىنشا كۇش- جىگەردى ۇيلەستىرۋدىڭ ماڭىزدىلىعىنا نازار اۋدارىپ، وسى فورماتتاعى تۇراقتى كەزدەسۋلەرگە دايىن ەكەنىن ءبىلدىردى.
ءىس-شارا قورىتىندىسى بويىنشا سىرتقى ىستەر مينيسترلەرى اقپاراتتىق كومميۋنيكەنى قابىلدادى، وندا «ورتالىق ازيا - قىتاي» فورماتى شەڭبەرىندە تاتۋ كورشىلىك، ورنىقتى دامۋ جانە كوپجاقتى ءوزارا ءىس-قيمىلدى تەرەڭدەتۋ قاعيداتتارىنا ورتاق مىندەتتەمە بەكىتىلدى.
وسىعان دەيىن مۇرات نۇرتىلەۋ قىتايدىڭ ورتالىق ازيا ەلدەرىمەن تاۋار اينالىمىنىڭ جارتىسى قازاقستانعا تيەسىلى ەكەنىن ايتقان بولاتىن.
ەسكە سالايىق، 25-ءساۋىر كۇنى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ جانە ق ك پ و ك ساياسي بيۋروسىنىڭ مۇشەسى، قىتاي حالىق رەسپۋبليكاسىنىڭ سىرتقى ىستەر ءمينيسترى ۆاڭ ي قازاقستان مەن قىتاي اراسىنداعى ستراتەگيالىق ديالوگتىڭ ەكىنشى وتىرىسىنا قاتىسقان ەدى.
