ساۋد ارابياسىنا قاجىلىققا بارعان 8 وزبەكستاندىق قازا تاپتى
تاشكەنت. KAZINFORM - ساۋد ارابياسىنا قاجىلىق پارىزىن وتەۋگە بارعان وزبەكستاننىڭ 8 ازاماتى كوز جۇمدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
- وكىنىشكە قاراي، وزبەكستان ۇكىمەتى تاراپىنان قابىلدانعان ءتيىستى شارالارعا قاراماستان، سوزىلمالى دەرتى بار 4 وتانداسىمىز قاجىلىق كەزىندە قايتىس بولدى. سونىمەن قاتار وسى ارالىقتا قۇزىرلى ورگانداردىڭ ەسكەرتۋىن ەلەمەي، ساۋد ارابياسىنا زاڭسىز بارعان 4 وزبەكستان ازاماتى قازا تاپتى. زاڭسىز جولداردى پايدالانا وتىرىپ، اتالعان ەلدىڭ اۋماعىنا ەنگەن وزبەكستاندىقتارعا العاشقى مەديتسينالىق كومەك كورسەتىلمەدى، - دەلىنگەن سىرتقى ىستەر مينيسترلىگىنە قاراستى «Dunyo» اقپارات اگەنتتىگىنىڭ حابارلاماسىندا.
رەسمي دەرەككە ساي، بيىل 15 مىڭنان استام وزبەكستاندىق قاجىلىق پارىزىن وتەدى. وسى ارالىقتا قۇجاتىن جوعالتقان 40 تان اسا ادام دجيددا قالاسىنداعى وزبەكستاننىڭ باس كونسۋلدىعىنا ءوتىنىش جولداعان. تيىسىنشە، ولارعا وتانىنا ورالۋعا رۇقسات بەرەتىن كۋالىكتەر بەرىلگەن.
ەسكە سالايىق، بۇعان دەيىن ساۋد ارابياسىندا قاجىلىققا ادامداردى زاڭسىز اپارعان 6 ازامات ۇستالعانىن جازىپ ەدىك.
سونىمەن قاتار ساۋد ارابياسىنىڭ بيلىگى قاجىلىق ەرەجەلەرىن بۇزعاندارعا قاتاڭ ايىپپۇلدار ەنگىزدى.
مۇنىمەن بىرگە، بيىل ساۋد ارابياسى قاجىلىق كەزىندە مەككەگە كىرۋگە جاڭا شەكتەۋلەر ەنگىزدى.
