سۋ تاسقىنىنان زارداپ شەككەندەردىڭ نەسيەسى 3 اي مەرزىمگە شەگەرىلەدى
استانا. KAZINFORM - مەملەكەت باسشىسى قاسىم-جومارت توقايەۆتىڭ 12 وڭىردەگى سۋ تاسقىنىنان زارداپ شەككەندەرگە كومەك كورسەتۋ تۋرالى تاپسىرماسى شەڭبەرىندە ق ر قارجى نارىعىن رەتتەۋ جانە دامىتۋ اگەنتتىگى بانكتەرمەن جانە ميكروقارجى ۇيىمدارىمەن بىرلەسىپ، زارداپ شەككەن ازاماتتارعا، شاعىن جانە ورتا بيزنەس سۋبەكتىلەرىنە قولداۋ كورسەتۋ ءىس-شارالارىن جۇزەگە اسىرىپ جاتىر.
ورتالىق كوممۋنيكاتسيالار قىزمەتىندە وتكەن بريفينگتە اتالعان اگەنتتىككە قاراستى قارجى قىزمەتتەرىن تۇتىنۋشىلاردىڭ قۇقىقتارىن قورعاۋ دەپارتامەنتى ديرەكتورىنىڭ ورىنباسارى قايرات تۇرىمتايەۆ سۋ تاسقىنىنان زارداپ شەككەندەردىڭ نەسيەسىن رەتتەۋ ماسەلەسىنە توقتالدى.
«جەرگىلىكتى اتقارۋشى ورگانداردىڭ تىزىمدەرىنە سايكەس، سۋ تاسقىنىنان زارداپ شەككەندەر ساناتىنا جاتقىزىلعان بارلىق ازاماتتاردىڭ كرەديتتەرى بويىنشا تولەمدەر اۆتوماتتى تۇردە 2024-جىلعى 1-ءساۋىر – 30-ماۋسىم ارالىعىندا 3 اي مەرزىمگە كەيىنگە شەگەرىلەدى. زارداپ شەككەن ازاماتتاردىڭ كرەديتتەرى بويىنشا سۋ تاسقىنى سالدارىنىڭ ىقپالىنا بايلانىستى تۋىنداعان، تولەمدەردىڭ كەشىكتىرىلگەنى ءۇشىن ايىپپۇلدار مەن ءوسىمپۇلدار كەيىنگە قالادى. زارداپ شەككەن بارلىق جەكە كاسىپكەرلەرگە، سونداي-اق سۋ تاسقىنى شارۋاشىلىق قىزمەتتىڭ بۇزىلۋىنا اكەپ سوققان شاعىن جانە ورتا بيزنەس سۋبەكتىلەرىنە ولاردىڭ بەرگەن وتىنىشتەرى ەسكەرىلە وتىرىپ، كرەديتتەر بويىنشا تولەمدەردى كەيىنگە قالدىرۋ مۇمكىندىگى بەرىلەدى»، - دەدى ول.
بانكتەر مەن مقۇ قارىز الۋشىلاردىڭ مۇلكى مەن جەكە شارۋاشىلىعىنا، تابىسى مەن قارجىلىق جاعدايىنا كەلتىرىلگەن زياننىڭ اسەرىن باعالاۋ ءۇشىن ءاربىر زارداپ شەككەن قارىز الۋشىنىڭ جاعدايىنا جەكە تالداۋ جۇرگىزبەك.
سونىڭ نەگىزىندە كرەديتتەر بويىنشا دەربەس قولداۋ كورسەتۋدىڭ قوسىمشا شارالارى ايقىندالادى.
