سۋ تاسقىنى تۋرالى جالعان اقپارات تاراتۋعا قاتىستى 2 قىلمىستىق ءىس قوزعالدى – ءى ءى م
استانا. KAZINFORM - ىشكى ىستەر مينيسترلىگى جالعان اقپارات تاراتپاۋعا شاقىرىپ، ول ءۇشىن جاۋاپكەرشىلىكتىڭ بارىن ەسكەرتەدى.
«پوليتسيا اقپاراتتىق كەڭىستىككە مونيتورينگ جۇرگىزۋدە. جالعان اقپاراتتىڭ تارالۋىنا جول بەرىلمەيدى. بۇگىنگى تاڭدا جالعان اقپارات تاراتۋ فاكتىسى بويىنشا قوستاناي جانە ماڭعىستاۋ وبلىسىندا 2 قىلمىستىق ءىس قوزعالدى. سونداي-اق، ماڭعىستاۋ، اتىراۋ، قوستاناي جانە سولتۇستىك قازاقستان وبلىستارىندا 4 اكىمشىلىك ءىس جۇرگىزىلىپ جاتىر. وسىعان بايلانىستى ىشكى ىستەر مينيسترلىگى ازاماتتاردى جالعان اقپارات تاراتپاۋعا جانە تەك رەسمي دەرەككوزدەرگە سەنۋگە شاقىرادى»، - دەدى مينيسترلىكتىڭ رەسمي وكىلى شىڭعىس الەكەشيەۆ و ك ق- دە وتكەن بريفينگىدە.
ونىڭ ايتۋىنشا، كەي جاعدايدا بىلمەستىكتەن جالعان اقپاراتتى تاراتىپ نەمەسە ءبولىسۋى مۇمكىن. الايدا زاڭدى بىلمەۋ جاۋاپكەرشىلىكتەن بوساتپايتىنىن ەستە ۇستاعان ءجون.
«جالعان اقپارات ادامداردا ۇرەي تۋدىرىپ، سۋ تاسقىنى سالدارىن جويۋعا تارتىلعان مەملەكەتتىك ورگانداردىڭ جۇمىسىنا كەدەرگى كەلتىرەدى. ەسكە سالا كەتسەك، زاڭ بويىنشا توتەنشە جاعداي كەزىندە كورىنەۋ جالعان اقپارات تاراتۋ، بيلىك وكىلىنە باعىنباۋ جانە وعان قاتىستى قورقىتۋ نەمەسە زورلىق-زومبىلىق ارەكەتىن جاساۋعا جاۋاپكەرشىلىك كۇشەيەدى. سونداي-اق، زاڭ بويىنشا توتەنشە جاعداي كەزىندە قىلمىستىق قۇقىق بۇزۋشىلىق جاساۋ جاۋاپكەرشىلىك پەن جازانى اۋىرلاتاتىن ءمان-جاي دەپ تانىلادى»، - دەيدى ول.
