سۋ تاسقىنى: قۇلسارى قالاسىنا قايىقپەن شىعىپ، جوعالىپ كەتكەن ەر ادام تابىلدى
اتىراۋ. KAZINFORM - پوليتسيا قىزمەتكەرلەرى ءبىر كۇن بۇرىن جوعالىپ كەتكەن 49 جاستاعى ەر ادامدى تاپتى.
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ەر ادامنىڭ جوعالعانى تۋرالى 102 ارناسىنا حابارلاما كەلگەن.
«جىلىوي اۋدانى پوليتسيا بولىمىنە 49 جاستاعى ەر ادامنىڭ قاراعاي اۋىلىنان قۇلسارى قالاسىنا قايىقپەن شىعىپ، ءبىر كۇننەن بەرى حابار-وشارسىز كەتكەنى تۋرالى اقپارات ءتۇستى. پوليتسيا قىزمەتكەرلەرى جەدەل ىزدەستىرۋ ءىس-شاراسىن جۇرگىزۋگە اۋە درونىن پايدالاندى. بۇگىن، 11-ءساۋىر كۇنى ساعات 11:00 شاماسىندا قاراعاي ەلدى مەكەنىنەن 10 شاقىرىم قاشىقتىقتا سۋ تاسقىنىنان پايدا بولعان ارالدان 49 جاستاعى ەر ادام تابىلدى. قازىر ونىڭ جاعدايى ءبىرقالىپتى، تۋىسقاندارىمەن قاۋىشتى»، - دەپ حابارلادى دەپارتامەنتتىڭ باسپا ءسوز قىزمەتى.
ەسكە سالا كەتەلىك، بۇدان بۇرىن قۇلسارىدا قاراۋسىز قالعان ۇيلەردى 110 پوليتسەي مەن 60 سارباز قاداعالاپ جۇرگەنىن جازعان ەدىك.
