سۋ تاسقىنى: 20 مىڭنان استام پوليتسەي قوعامدىق ءتارتىپتى باقىلاۋدا
استانا. KAZINFORM - ىشكى ىستەر ورگاندارىنىڭ قىزمەتكەرلەرى سۋ تاسقىنىنا ۇشىراعان وڭىرلەردە تاۋلىك بويى جۇمىس ىستەپ جاتىر. تولىعىراق ىشكى ىستەر مينيسترلىگى اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا ايتىپ بەردى.
«ىشكى ىستەر ورگاندارىنىڭ جەكە قۇرامى جۇمىستى كۇشەيتىلگەن رەجيمدە جالعاستىرۋدا. جەدەل شتابتار تاۋلىك بويى جۇمىس ىستەپ تۇر. كۇن سايىن 20 مىڭنان استام قىزمەتكەر قوعامدىق ءتارتىپتى قامتاماسىز ەتەدى. سونىمەن قاتار پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتشىلەرى بىرلەسكەن اۆاريالىق-قۇتقارۋ وپەراتسيالارىنا قاتىسۋدا. وعان 4 مىڭنان استام پوليتسەي مەن اسكەري قىزمەتشىلەر، ۆەدومستۆولىق اكادەميالاردىڭ كۋرسانتتارى تارتىلدى»، - دەدى اقتوتى بورانوۆا و ق ك- دە وتكەن بريفينگىدە.
ءى ءى م وكىلىنىڭ مالىمدەۋىنشە، سۋ باسقان ايماقتاردا پوليتسيا ۆەدومستۆوسىنىڭ 700 گە جۋىق تەحنيكاسى جۇمىلدىرىلعان. بۇل پاترۋلدىك اۆتوكولىكتەر، قىزمەتتىك اۆتوبۋستار، كامازدار، 2 تىكۇشاق جانە 2 ۇشاق بار.
«ءتارتىپ ساقشىلارىنىڭ كومەگىمەن 10 مىڭ مەتردەن استام ارىق تازارتىلدى. سۋ اعىنىن بوگەۋ ءۇشىن 144 مىڭنان استام قۇم سالىنعان قاپ توسەلدى. سۋ تاسقىنى باستالعالى 12,6 مىڭ ادام ەۆاكۋاتسيالاندى، ونىڭ ىشىندە 300 گە جۋىق ادام تىكۇشاقپەن قۇتقارىلدى. قازىر پوليتسيانىڭ قورعاۋىندا 9135 تۇرعىن ءۇي جانە باسقا دا نىساندار بار، توناۋعا جول بەرىلمەيدى»، - دەيدى ول.
