ەس-ءتۇسسىز جاتقان ادام ءسوز تۇسىنەدى - زەرتتەۋ

بۇعان دەيىن جالپى انەستەزياداعى ادام ميى سىرتقى اقپاراتتى كۇردەلى دەڭگەيدە وڭدەي المايدى دەگەن تۇسىنىك بولعان. الايدا جاڭا زەرتتەۋ بۇل كوزقاراسقا كۇمان كەلتىرىپ وتىر. عالىمداردىڭ ايتۋىنشا، ەس- ءتۇسسىز جاتقان ادامنىڭ گيپپوكامپى، ياعني ەستە ساقتاۋ مەن اقپاراتتى وڭدەۋگە جاۋاپتى مي بولىگى ەستىلگەن سوزدەردىڭ ماعىناسىن تالداپ، سويلەمنىڭ جالعاسىن بولجاۋعا تىرىسقان.

زەرتتەۋ بارىسىندا ەپيلەپسيامەن اۋىراتىن جەتى ناۋقاسقا وپەراتسيا كەزىندە دىبىستىق سيگنالدار مەن پودكاست ۇزىندىلەرى تىڭداتىلعان. سول ساتتە عالىمدار ولاردىڭ ميىنداعى جەكە نەيرونداردىڭ بەلسەندىلىگىن ارنايى وتە جۇقا زوندتار ارقىلى باقىلاعان. بۇل قۇرىلعىلار ادامنىڭ شاشىنان دا جىڭىشكە جانە جۇزدەگەن جاسۋشانىڭ سيگنالىن ءبىر ۋاقىتتا تىركەي الادى.

ناتيجەسىندە انەستەزيا اسەرىندەگى گيپپوكامپتىڭ دىبىستاردى اجىراتىپ قانا قويماي، سوزدەردىڭ گرامماتيكاسى مەن ماعىناسىن وڭدەيتىنى بايقالعان. كەي نەيروندار سويلەم كونتەكسىنە قاراي كەلەسى ءسوزدى الدىن الا «بولجاپ» وتىرعان. ەڭ قىزىعى، بۇل بەلسەندىلىك سەرگەك ادامداردىڭ ميىنداعى رەاكتسيالارعا ۇقساس بولعان.

زەرتتەۋشىلەردىڭ تۇسىندىرۋىنشە، قولدانىلعان پروپوفول پرەپاراتى مي بولىمدەرىنىڭ ءوزارا بايلانىسىن السىرەتىپ، سانانى «سوندىرەدى». ءبىراق گيپپوكامپ اقپاراتتى قابىلداۋ جانە وڭدەۋ جۇمىسىن تولىق توقتاتپايدى.

سامير شەت ەسىمدى نەيروحيرۋرگ ادامنىڭ ميى وتە كۇردەلى جۇيە ەكەنىن ايتادى. ونىڭ پىكىرىنشە، كەيبىر كوگنيتيۆتىك پروتسەستەر ادام ونى سەزبەسە دە جالعاسا بەرەدى.

عالىمدار بۇل جاڭالىقتىڭ بولاشاقتا كومادا نەمەسە ۆەگەتاتيۆتى كۇيدەگى پاتسيەنتتەردىڭ مي بەلسەندىلىگىن باعالاۋعا كومەكتەسۋى مۇمكىن ەكەنىن ايتادى. الداعى زەرتتەۋلەردە ماماندار انەستەزيانىڭ باسقا تۇرلەرىن دە تەكسەرىپ، ادامنىڭ ۇيقىداعى ميى شەتەل تىلدەرىن قالاي قابىلدايتىنىن زەرتتەمەك.