پرەزيدەنتتەر تاجىكستانداعى مادەنيەت كۇندەرىنە ارنالعان سالتاناتتى كونسەرتتى تاماشالادى
دۋشانبە. KAZINFORM - «كوحي بورباد» سارايىندا وتكەن گالا-كونسەرتتە قازاقستان مەن تاجىكستاننىڭ ونەر مايتالماندارى، سونىڭ ىشىندە Astana ballet بالەت ترۋپپاسى مەن سيمفونيالىق وركەسترى، «استانا وپەرا» مەملەكەتتىك وپەرا جانە بالەت تەاترىنىڭ حورى، Hassak ەتنو-فولك توبى جانە تاعى دا باسقا شىعارماشىلىق ۇجىمدار ونەر كورسەتتى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
ساحنادا قوس حالىقتىڭ تانىمال مۋزىكالىق شىعارمالارى مەن الەمدىك كلاسسيكا رەپەرتۋارىنان ۇزىندىلەر ورىندالىپ، حورەوگرافيالىق كومپوزيتسيالار ۇسىنىلدى.
باۋىرلاس تاجىك حالقى ديماش قۇدايبەرگەن، ايگۇل ۇلكەنبايەۆا، تەمىرلان بەيسەمباي (Ratovich)، «el Voice» توبى، فارۋح توحتامۋراتوۆ (Adam) سياقتى مادەنيەت قايراتكەرلەرىنىڭ ونەرىن تاماشالادى.
قازاقستاننىڭ مادەنيەت كۇندەرى اياسىندا دۋشانبە، حۋدجاند جانە بوحتار قالالارىندا مادەنيەتارالىق بايلانىستاردى كەڭەيتۋدى كوزدەيتىن ءبىرقاتار ماڭىزدى ءىس-شارا وتەدى.
وسى اپتادا ءابىلقاسىم فيرداۋسي اتىنداعى مادەنيەت جانە دەمالىس ساياباعىندا قازاقتىڭ باس اقىنى، حاكىم اباي قۇنانباي ۇلىنىڭ ەسكەرتكىش-بيۋستى سالتاناتتى تۇردە اشىلدى.
بۇدان بولەك، ۇلتتىق مۋزەيدەگى بىرەگەي جادىگەرلەردەن جاساقتالعان قازاق حالقىنىڭ ساندىك- قولدانبالى ونەرىنىڭ كورمەسى جانە وتاندىق كينەماتوگرافتار تۇسىرگەن فيلمدەردىڭ كورسەتىلىمى ۇيىمداستىرىلدى.
