پرەزيدەنت تەلەراديوكەشەنى سوعىس ارداگەرى جاقان سەيسەبايەۆتى عاسىر جاسىمەن قۇتتىقتادى
الماتى. قازاقپارات - 10-ناۋرىزدا سوعىس ارداگەرى جاقان سەيسەمبايەۆ ءوزىنىڭ 100 جىلدىق مەرەيتويىن اتاپ وتەدى.
جىل ساناپ قاتارى سيرەپ بارا جاتقان سوعىس ارداگەرلەرى - ءتىلى بار ءتىرى تاريحتىڭ ناعىز ءوزى. سولاردىڭ ءبىرى - الماتىلىق جاقان سەيسەبايەۆ. اقساقال 10-ناۋرىز كۇنى 100 جاسقا تولادى. ەكىنشى دۇنيەجۇزى سوعىسىنىڭ ارداگەرىنە تۋعان كۇنى قارساڭىندا پرەزيدەنت تەلەراديوكەشەنىنىڭ ۇجىمى قۇرمەت كورسەتتى.
Kazinform اگەنتتىگى باسقارۋشى ديرەكتورىنىڭ ورىنباسارى - قازاق رەداكسياسىنىڭ باس رەداكتورى ناعاشىبەك الدان قارت جاۋىنگەرگە شاپان جاۋىپ، شيپاجايعا جولداما تابىستادى.
ءوز كەزەگىندە ارداگەر باتاسىن بەرىپ، سوعىس جىلدارىنداعى ەستەلىكتەرىمەن ءبولىستى.
جاقان سەيسەبايەۆ بەلارۋستى ازات ەتۋ شايقاسىنا قاتىسىپ، ءۇش جەردەن جاراقات العان. جەڭىس كۇنىن كەنيگسبەرگتە قارسى الدى. ودان كەيىن سوۆەت-جاپون سوعىسىنا قاتىسىپ، ەلگە 1948-جىلى ورالادى.
- 17 جاسىمدا سوعىسقا اتتاندىم. سۇراپىل سوعىستا باستان كوپ وقيعا ءوتتى. 1942-جىلى ءبىزدى ارميا قاتارىنا الدى. ءتورت اي بويى اسكەري تەحنيكانى باسقارۋدى ۇيرەتتى، ول كەزدە ءارتۇرلى ارتيللەريالىق قۇرىلعىلار بولدى. 1943-جىلى 1-قاڭتاردا بەلارۋستىك فرونتقا ءتۇستىم. ءبىز رەاكتيۆتى ارتيللەريانىڭ ب م-13 «كاتيۋشا» ماشيناسىن قولداندىق. 1943-جىلى 12-ناۋرىزدا وڭ جاق جەلكەم مەن باسىمنان جاراقات الدىم. وسى وقيعادان كەيىن مەنى ماسكەۋگە گوسپيتالگە الىپ باردى، - دەيدى سوعىس ارداگەرى.
ول جەڭىس كۇنىن قالاي قارسى العانىن ەسىنە الدى.
- جەڭىستى كەنيگسبەرگتە (شىعىس پرۋسسيا) قارسى الدىم. 8-مامىر كۇنى جەڭىسكە جەتكەنىمىزدى ەستىگەن كەزدە ءبىر جىلاپ، ءبىر كۇلىپ، قۇشاقتاسىپ، جاۋىنگەرلەر ءبىر-ءبىرىمىزدى قۇتتىقتادىق. ودان كەيىن جاپون سوعىسىنا اتتاندىم. ول اياقتالعان سوڭ سولتۇستىك كورەياعا سوعىسقا اتتاندىم. ءۇش سوعىستان امان قالدىم، - دەدى ارداگەر.
ۇرىستا كورسەتكەن جاۋىنگەرلىك ەرلىگى ءۇشىن وتان سوعىسى وردەنى، 2-دارەجەلى «ەرلىگى ءۇشىن» مەدالىمەن ناگرادتالعان.
- ەرەكشە قاسيەتى وتە اشىق ادام، ەلدىڭ بارلىعىنا جاقسىلىق جاساعاندى جاقسى كورەدى. بارىنە كومەكتەسكىسى كەلىپ جۇرەدى. ەڭبەققور جان. اكەمىز سوعىس جىلدارىندا باسىنان وتكەرگەن وقيعالاردى قاعازعا ءتۇسىرىپ قويعان. الداعى ۋاقىتتا سونى كىتاپ ەتىپ شىعارعىمىز كەلەدى، - دەيدى قىزى روزا سەيسەبايەۆا.
ارداگەر ۇل-قىزدارىنان 10 نەمەرە، 20 شوبەرەسى مەن 1 شوپشەك ءسۇيىپ وتىر.
بۇعان دەيىن پرەزيدەنت تەلەراديوكەشەنى سوعىس ارداگەرى جاقان سەيسەبايەۆقا قۇرمەت كورسەتكەن بولاتىن.
