پرەزيدەنت تاپسىرماسى: شارۋالاردان استىق ساتىپ الۋ باستالادى

استانا. KAZINFORM - ۇكىمەت رەزەرۆىنەن بولىنگەن قاراجات ەسەبىنەن 150 مىڭ توننا استىق ساتىپ الۋ قاراستىرىلىپ وتىر. بۇل تۋرالى پارلامەنت ماجىلىسىندە بيىلعى استىقتى وتكىزۋ ماسەلەسىن تالقىلاۋ كەزىندە ق ر اۋىل شارۋاشىلىعى ءمينيسترى ايداربەك ساپاروۆ ءمالىم ەتتى.

«اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى نارىقتاعى باعانى ۇستاپ تۇرۋ ءۇشىن ازىق-تۇلىك كورپوراتسياسى ارقىلى شارۋالاردان استىق ساتىپ الۋدى تاپسىردى. وسى تاپسىرمانى ورىنداۋ ماقساتىندا بۇگىن كورپوراتسيا استىقتى ساتىپ الۋ باعاسىن جاريالايدى. ۇكىمەت رەزەرۆىنەن وسى باعىتتا 10 ميلليارد تەڭگە ءبولۋ جوسپارلانعان. بۇل قاراجاتتىڭ ەسەبىنەن 150 مىڭ توننا ساتىپ الۋ قاراستىرىلىپ وتىر»، - دەدى ا. ساپاروۆ.

ونىڭ ايتۋىنشا، تاعى دا استىق ساتىپ الۋ ءۇشىن قاراجات ءبولۋ ماسەلەسى ەرتەڭ ۇكىمەتتە قارالادى.

سونىمەن قاتار ءماجىلىس دەپۋتاتتارى استىق ساتىپ الۋ باعاسىنىڭ قۇلدىراۋىنا بايلانىستى جاعدايدى قالپىنا كەلتىرۋ ءۇشىن نە ىستەلىپ جاتقىنىن سۇرادى.

ءوز كەزەگىندە مينيستر بۇل جۇمىستارعا دا ازىق-تۇلىك كورپوراتسياسى قاتىساتىنىن ايتتى.

«ولار وزدەرى تالقىلاعان ءىرى كەلىسىمشارتتاردى ورىنداۋ ءۇشىن قازىردىڭ وزىندە فەرمەرلەردەن استىق پارتيالارىن جيناستىرىپ جاتىر. قازىر قۇنى 20 ميلليون دوللار بولاتىن 5 ەكسپورتتىق كەلىسىمشارت جاسالعان. استىقتى تاسىمالداۋ شىعىندارىن سۋبسيديالاۋ ەرەجەلەرى تاياۋدا قابىلدانادى. سۋبسيديالاۋدىڭ بۇل ءتۇرى قارا تەڭىز، بالتىق، وڭتۇستىك شىعىس ازيا جانە باسقا دا پورتتارعا استىقتى تاسىمالداۋ قۇنىن تومەندەتەدى. بۇل تۇرعىدا ءبىزدىڭ استىق ەۋروپا، افريكا، كاۆكاز جانە باسقا دا پەرسپەكتيۆالى نارىقتاردا باسەكەگە قابىلەتتى بولادى. ەرەجەلەر جاقىن ارادا قابىلدانادى. بارلىق مينيسترلىكتەر كەلىستى. وسى اپتادا ءبىز بۇل ماسەلەلەردى شەشەمىز»، - دەدى ۆەدومستۆو باسشىسى.

ەسكە سالساق، جاقىندا پرەزيدەنت ۇكىمەتكە ازىق-تۇلىك كورپوراتسياسى ارقىلى شارۋالاردان استىق ساتىپ الۋدى تاپسىردى.

اۆتور

رۋسلان عابباسوۆ