پرەزيدەنت كۋۆەيت مەملەكەتىنىڭ جاڭا امىرىنە كوڭىل ايتۋ جەدەلحاتىن جولدادى

پرەزيدەنت قاسىم-جومارت توقايەۆ كۋۆەيت ءامىرى شەيح ناۋۋاف ءال-احماد ءال- دجابەر اس-ساباحتىڭ دۇنيەدەن وزۋىنا بايلانىستى كۋۆەيت مەملەكەتىنىڭ جاڭا ءامىرى شەيح ميشاال ءال-احماد ءال-دجابەر اس-ساباحقا جانە كۋۆەيت حالقىنا كوڭىل ايتتى. بۇل تۋرالى Kazinform اقورداعا سىلتەمە جاساپ حابارلادى.

- كۋۆەيت مەملەكەتىنىڭ ءامىرى شەيح ناۋۋاف ءال-احماد ءال- دجابەر اس-ساباحتىڭ دۇنيەدەن وزعانى تۋرالى سۋىق حاباردى تەرەڭ كۇيزەلىسپەن قابىل الدىم. شەيح ناۋۋاف - ءومىرىن كۋۆەيتتىڭ ءوسىپ-وركەندەۋىنە جانە حالقىنىڭ باياندى بولاشاعىن قامتاماسىز ەتۋگە، ايماقتاعى بەيبىتشىلىك پەن تۇراقتىلىقتى ساقتاۋعا ارناعان تۇلعا. قازاقستان حالقى ونى پاراساتتى باسشى، حالىقارالىق دەڭگەيدەگى بەدەلدى ساياساتكەر، ەكىجاقتى ىنتىماقتاستىقتى نىعايتۋعا زور ەڭبەك سىڭىرگەن تاريحي قايراتكەر رەتىندە ءاردايىم ەسىندە ساقتايدى. قارالى ساتتە سىزگە جانە اۋلەتىڭىزگە، سونداي-اق بارشا وتانداسىڭىزعا قازاقستان حالقىنىڭ جانە جەكە ءوزىمنىڭ اتىمنان كوڭىل ايتىپ، قايعىلارىڭىزعا ورتاقتاسامىن، - دەپ جازىلعان جەدەلحاتتا.