پرەزيدەنت ج ي-گە ماماندانعان جاڭا زەرتتەۋ ۋنيۆەرسيتەتىن اشۋدى تاپسىردى
استانا. KAZINFORM - پرەزيدەنت قاسىم-جومارت توقايەۆ ەلىمىزدە جاساندى ينتەللەكت سالاسىنا ماماندانعان جاڭا زەرتتەۋ ۋنيۆەرسيتەتىن قۇرۋعا تاپسىرما بەردى.
بۇل باستامانى مەملەكەت باسشىسى جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسىندا ايتتى.
- وقۋ ورنىنا ارنايى مارتەبە بەرگەن ءجون. سونداي-اق، بۇل جۇمىسقا الەمنىڭ ۇزدىك وقۋ ورىندارىن سەرىكتەس رەتىندە تارتۋ قاجەت. ۇكىمەت جىل سوڭىنا دەيىن وسى ماسەلە بويىنشا ناقتى ۇسىنىس بەرۋگە ءتيىس. وسىنداي جاڭا وقۋ ورنى بىزگە نە ۇشىن قاجەت دەگەن ساۋال دا تۋىنداۋى مۇمكىن. باستى ماقسات - ەكونوميكانىڭ بارلىق سالاسىنا ج ي تەحنولوگياسىن ەنگىزەتىن بىلىكتى مامانداردى دايارلاۋ. زەرتتەۋ ۋنيۆەرسيتەتى ءبىلىم عىلىم، يننوۆاتسيا جانە حالىقارالىق بايلانىس ورتالىعى رەتىندە جۇمىس ىستەۋى كەرەك، - دەدى پرەزيدەنت.
ايتا كەتەيىك، جاساندى ينتەللەكتىنى دامىتۋ جونىندەگى كەڭەس پرەزيدەنت جارلىعىمەن قۇرىلعان جانە ول - ەلدەگى ج ي دامىتۋدىڭ ستراتەگياسىن قالىپتاستىراتىن، تەحنولوگيالاردى ەكونوميكانىڭ نەگىزگى سالالارى مەن مەملەكەتتىك باسقارۋعا ەنگىزۋدى سۇيەمەلدەيتىن، سونداي-اق سالالىق باعدارلامالار مەن ستراتەگيالىق قۇجاتتارعا ۇسىنىستار ازىرلەيتىن كەڭەسشى-كونسۋلتاتيۆتىك ورگان.
ءبىرىنشى وتىرىسقا قازاقستان ۇكىمەتىنىڭ وكىلدەرى، ونىڭ ىشىندە پرەمەر-مينيستر مەن سالالىق مينيسترلەر، سونداي-اق الەمنىڭ جەتەكشى ۋنيۆەرسيتەتتەرى مەن كومپانيالارىنان حالىقارالىق ساراپشىلار مەن عالىمدار قاتىسۋدا. ولاردىڭ قاتارىندا ب ا ءا، ا ق ش جانە قىتاي ماماندارى بار.
