پرەزيدەنت 3 جاسار اتىراۋلىق بالاقايعا العىسىن ءبىلدىردى
اتىراۋ. KAZINFORM - اتىراۋدا تۇراتىن 3 جاسار دىنمۇحاممەد جۇماجاننىڭ شاشىلعان قوقىس جيناعانى كوپشىلىكتى سۇيسىندىرگەن ەدى. پرەزيدەنت بالاقايعا العىسىن ءبىلدىردى.
اتىراۋ وبلىسىنىڭ اكىمى سەرىك شاپكەنوۆ 3 جاسار بالاقاي مەن ونىڭ اتا-اناسىمەن كەزدەسىپ، مەملەكەت باسشىسىنىڭ العىسىن تاپسىردى.
- مەملەكەت باسشىسىنىڭ «تازا قازاقستان» باستاماسى ۋاقىتشا ءىس-شارا ەمەس، ءار ازاماتتىڭ كۇندەلىكتى اتقاراتىن ىسىنە اينالىپ وتىر. كەيدە كوپ سوزدەن گورى وسىنداي ناقتى قادامنىڭ اسەرى وزگەشە بولادى. دىنمۇحاممەد ءالى دە ويىن بالاسى بولسا دا، ونىڭ ارەكەتى كوپكە وي سالدى. بۇل - وتباسىنداعى ءتالىمدى تاربيەنىڭ جەمىسى، ناعىز وتانسۇيگىشتىكتىڭ ۇلگىسى. كىشكەنتاي دىنمۇحاممەدتىڭ شاشىلعان قوقىس جيناعانى بارشاعا وي سالدى، - دەدى سەرىك شاپكەنوۆ.
بالاقايدىڭ اكەسى ەرجان حايروشەۆتىڭ ايتۋىنشا، تۇرعىنداردىڭ ءبىرى ۇلىن ۆيدەوعا ءتۇسىرىپ، الەۋمەتتىك جەلىگە جۇكتەگەن.
- ءبىز ءوزىمىز تۇراتىن شاعىن اۋداندا ورازا ايت مەيرامىن كەڭ كولەمدە تويلادىق. سول كەزدە ۇلىمىزدىڭ ارەكەتى ەلدىڭ ىقىلاسىنا بولەنەدى دەپ ويلامادىق. ونىڭ ءتىلى كەش شىقتى. سوسىن بالاباقشاعا بەردىك. بالاباقشادان ۇيرەنگەنى دە بار شىعار. ءوز وتباسىمىزدا دا تازالىققا ءمان بەرەمىز. سەنبىلىكتەردەن قالمايمىز. مەن ۇلىمنىڭ ەلدىڭ پاتريوتى بولىپ ەر جەتكەنىن قالايمىن، - دەيدى ەرجان حايروشەۆ.
وبلىس اكىمى دىنمۇحاممەدكە ەسكەرتكىش سىيلىق تاپسىرىپ، اتا-اناسىنا العىس ايتتى.
اتىراۋ وبلىسى اكىمى باسپا ءسوز قىزمەتىنىڭ مالىمەتىنشە، ەلدى مەكەندەردى كوگالداندىرۋدىڭ ايماقتىق جوسپارى جاسالعان. سوعان سايكەس 63 گەكتار اۋماققا 145 مىڭ 700 كوشەت وتىرعىزۋ جوسپارلانعان.
ەسكە سالا كەتەلىك، بۇدان بۇرىن اتىراۋ مەكتەپتەرىنىڭ اسحاناسىندا 71 مىڭنان استام وقۋشىعا ديەتالىق تاماق بەرىلەتىنىن جازعان ەدىك.
اۆتور
جولداسبەك شوپەعۇل
