پەريزات قايراتتىڭ سوتى نەلىكتەن ءىشىنارا جابىق وتەدى - سۋديا جاۋابى

استانا. KAZINFORM - استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ سۋدياسى سابىرجان كارىموۆ پەريزات قايراتقا قاتىستى سوت وتىرىسىنىڭ ءىشىنارا جابىق ءوتۋ سەبەبىن زاڭ تىلىمەن ءتۇسىندىردى.

- بانك قۇپياسى سانالاتىن مالىمەتتىڭ ساقتالۋىن قامتاماسىز ەتۋدى ەسكەرە وتىرىپ، سوت ايىپتالۋشىلاردان جاۋاپ الۋ كەزىندە، ياعني تۇسىنىكتەمە بەرۋى بارىسىندا، قۇپيا اقپارات بولۋى مۇمكىن مالىمەتتەر ايتىلسا، سونداي-اق قىلمىستىق ءىس ماتەريالدارىن زەرتتەۋ كەزىندە، بانك قۇپياسى سانالاتىن دەرەكتەر بولۋى مۇمكىن جاعدايدا، سوت تالقىلاۋىنىڭ جاريالىلىعىن شەكتەۋ تۋرالى شەشىم قابىلداندى، - دەدى سابىرجان كارىموۆ.

سۋديانىڭ مالىمدەۋىنشە، قالعان جاعدايدا سوت وتىرىسى اشىق رەجيمدە وتەدى.

- ال قازاقستاننىڭ يزرايل جانە پالەستينامەن حالىقارالىق قارىم-قاتىناسقا اسەر ەتۋى مۇمكىن جاعداي تۋرالى وتىنىشكە كەلسەك، تاعىلعان ايىپتا قاقتىعىس جاعدايى كورسەتىلمەگەن، ياعني ايىپتالۋشى پەريزات قايراتقا تاعىلعان ايىپپەن بايلانىستى ەمەس. سوت ءىستى تەك تاعىلعان ايىپ شەڭبەرىندە قارايدى. وسىلايشا، سوت تالقىلاۋىنىڭ جاريالىلىعى تەك زاڭمەن قورعالاتىن مۇددەنى ساقتاۋ قاجەتتىلىگى شەگىندە عانا ۇستالادى، ال قالعان جاعدايدا جاريالىلىق قاعيداتى ساقتالادى. قىلمىستىق ءىستى قاراۋ بارىسىندا بارلىق قاتىسۋشى مەن باسقا دا تۇلعالار اتالعان قاعيداتقا باعىنۋى ءتيىس. وسىعان بايلانىستى الدىن الا تىڭداۋ جابىق دەپ جاريالاندى. قىلمىستىق ءىس كولەمىنىڭ اۋقىمدىلىعىن ەسكەرە وتىرىپ، سوت قاتىسۋشىلارى ءۇشىن كەستە جاساۋ قاجەت، - دەپ ءتۇسىندىردى سۋديا.

سوت وتىرىسى اپتا سايىن دۇيسەنبى جانە سەيسەنبى كۇندەرى ساعات 10:00 دە وتەدى.

بەلگىلى بولعانداي پەريزات قايراتتىڭ سوتى ءىشىنارا جابىق وتەتىن بولدى.

بۇعان دەيىن ەلوردادا پەريزات قايراتتىڭ ىسىنە قاتىستى الدىن الا سوت وتىرىسى وتكەنىن حابارلاعان ەدىك.

ايتا كەتسەك، بيىل 30-ماۋسىمدا پەريزات قايراتتىڭ ءىسى سوتقا جىبەرىلدى.

ەسكە سالايىق، ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى 2024-جىلى 14-قاراشادا بەلگىلى بولدى.