پەريزات قايرات كەيسىنەن كەيىن قايىرىمدىلىق قورلار قىزمەتىنە تەكسەرۋ جۇرە مە

استانا. KAZINFORM - ەلوردادا ۇستىنەن ءىس قوزعالىپ جاتقان قوعام بەلسەندىسى پەريزات قايراتقا قاتىستى ىستەن كەيىن قازاقستاندىقتاردىڭ كوكەيىندە قايىرىمدىلىق قورلارىنىڭ قىزمەتىنە قاتىستى ساۋال كوپ.

بۇگىن ۇكىمەت ۇيىندە وتكەن باسپا ءسوز ءماسليحاتىندا پرەمەر-ءمينيستردىڭ ورىنباسارى ەرمەك كوشەربايەۆقا «ءىستى بولىپ جاتقان پەريزات قايرات جەتەكشىلىك ەتكەن «Biz birgemiz» قورىنىڭ ميللياردتاعان قارجىسى قولدى بولۋىنا بايلانىستى باسقا دا قور، ۇيىمداردىڭ قىزمەتى تەكسەرىلە مە؟» دەگەن ساۋال قويىلدى.

- بيىل ساۋىردە وسى سالامەن اينالىساتىن قۇزىرلى مينيسترلىك وكىلدەرىن جينادىم. بۇل ماسەلە ءبارىمىزدى دە تولعاندىرادى. شىن مانىندە ناقتى كومەك كورسەتىپ جۇرگەن جاۋاپتى قورلار بار. ءبىراق قايىرىمدىلىقتى جەلەۋ ەتىپ، اسىرەسە، الەۋمەتتىك جەلىلەردە ارەكەت ەتەتىندەر دە بار. بۇل تەك قورلارعا عانا قاتىستى ەمەس، كەيبىر ازاماتتار فوتوسۋرەتتەر جاريالاپ، كەيىن حالىق سول جەرگە قاراجات اۋدارادى، ءبىراق، ونىڭ ناقتى قايدا كەتەتىنىن تۇسىنبەي جاتادى. بۇل ماسەلە زاڭ جاعىنان دا جەتكىلىكتى رەتتەلمەگەن، ياعني قاراجاتتىڭ قايدا كەتىپ جاتقانىن باقىلاۋ مۇمكىن ەمەس. تەك پەريزات قايراتقا قاتىستى جاعداي عانا ەمەس، سوعان ۇقساس باسقا دا قورلارعا قاتىستى وقيعا اشىلىپ وتىر. ءبىراق، ونداي جايتتار قۇقىق قورعاۋ ورگاندارىنىڭ نازارىنا ىلىككەندە عانا كورىنىپ جاتىر، - دەپ جاۋاپ بەردى ەرمەك كوشەربايەۆ.

وسى ورايدا ۇكىمەت باسشىسىنىڭ ورىنباسارى اتالعان سالاعا ءتيىستى زاڭنامالىق وزگەرىستەر مەن باسقا دا رەتتەۋشى فۋنكتسيالاردى ەنگىزۋ قاجەتتىگىن ايتىپ وتىر.

- قايىرىمدىلىق - مەملەكەت تىكەلەي ارالاسپايتىن سالا. مەملەكەت قورلاردىڭ قىزمەتىنە ارالاسا المايدى، ويتكەنى قوعامدىق باستاما نەمەسە ازاماتتاردىڭ باستاماسىمەن جۇزەگە اسىرىلادى. كەيبىرەۋلەر بۇل ءىستى ءومىر ءسۇرۋ كوزىنە اينالدىرسا، كەيبىرەۋلەر شىنىمەن ۆولونتەرلەرمەن بىرلەسىپ جۇمىس ىستەپ، كومەك كورسەتەدى. ءبىز مۇنداي جاعدايدىڭ كۋاسى بولىپ ءجۇرمىز، - دەپ تولىقتىردى ۆيتسە-پرەمەر.

سونداي-اق ەرمەك كوشەربايەۆ سالانى تولىق زەرتتەپ، تالقىلاپ بولعان سوڭ، ءتيىستى زاڭناماعا وزگەرىستەر ەنگىزىلەتىنىن ايتتى.

- ماسەلە قوعام تالقىسىنا شىعارىلادى، دەپۋتاتتارمەن بىرلەسىپ قارالادى. بۇل سالانى مىندەتتى تۇردە رەتتەپ، باقىلاۋعا الۋ قاجەت. ادامدار اقشاسىن قايدا جىبەرىلىپ جاتقانىن كورىپ، ول قاراجاتتىڭ شىنىمەن باستاپقىدا ايتىلعان ماقساتقا جۇمسالىپ جاتقانىن ءبىلۋى ءتيىس. ءبىزدىڭ ازاماتتاردىڭ جۇرەگى جۇمساق، كومەكتەسكىسى كەلىپ تۇرادى. بۇل رەتتە مەملەكەت ناقتى كومەك كورسەتە الاتىن ۇيىمداردىڭ عانا جۇمىس ىستەۋىن قامتاماسىز ەتۋى ءتيىس، - دەپ قورىتىندىلادى ۇكىمەت باسشىسىنىڭ ورىنباسارى.

ايتا كەتەيىك، بۇگىندە ەلوردادا «Biz birgemiz» قورىنىڭ بۇرىنعى جەتەكشىسى پەريزات قايرات پەن ونىڭ اناسى عايني الاشبايەۆاعا قاتىستى سوت ءوتىپ جاتىر. پروكۋرور پەريزات قايراتتى 10 جىل، اناسىن 8 جىل باس بوستاندىعىنان ايىرۋدى سۇراپ وتىر.

بۇعان دەيىن حابارلاعانىمىزداي ەندى ەلىمىزدەگى قايىرىمدىلىق قورلارى ب ا ق-تا ەسەپ جاريالاۋعا مىندەتتەلەدى.