پەريزات قايرات ءىسى: تاعى ءبىر قۇرىلىس كومپانياسى قورعا 200 ميلليون تەڭگە اۋدارعان
استانا. KAZINFORM - ەلوردادا Biz birgemiz قورىنىڭ جەتەكشىسى بولعان پەريزات قايرات پەن ونىڭ اناسىنا قاتىستى سوت وتىرىسى ءۇشىنشى كۇنگە جالعاستى.
بۇگىنگى سوت وتىرىسى كۋاگەرلەردەن جاۋاپ الۋدان باستالدى. سوتتا «سترويكونسترۋكسيا» ا ق- نىڭ وكىلى، زاڭگەر گالينا يسايەۆا جاۋاپ بەردى. ونىڭ ايتۋىنشا، كومپانيا 2024 -جىلعى سۋ تاسقىنى كەزىندە پەريزات قايراتتىڭ قورىنا 200 ميلليون تەڭگە اۋدارعان.
كۋاگەردىڭ مالىمدەۋىنشە، قۇرىلىس كومپانياسى Biz birgemiz قورىمەن بايلانىسقا شىققان. سونداي-اق كومپانيا باسشىلىعى قايىرىمدىلىق ۇيىمى تۋرالى الەۋمەتتىك جەلىلەردەگى بەينەروليكتەر مەن جارناما جانە اشىق اقپارات كوزدەرىنەن بىلگەن.
2024 -جىلعى 2-مامىردا سۋ تاسقىنىنان زارداپ شەككەن جاندارعا كومەك كورسەتۋ تۋرالى شەشىم قابىلدانعان. ال 10-مامىردا كومپانيا پەريزات قايرات قورىنىڭ شوتىنا 200 ميلليون تەڭگە اۋدارعان. قوردىڭ رەكۆيزيتى جارناماداعى بەينەروليكتەن الىنعان.
ودان بولەك گالينا يسايەۆا ينتەرنەتكە ورنالاستىرىلعان ماتەريالدار كومپانيا باسشىلىعىنىڭ شەشىمىنە اسەر ەتكەنىن ايتتى.
- نەلىكتەن مەن جارنامانى باسشىما اپاردىم؟ وندا پەريزات قايراتتىڭ «نەسيەنى توقتاتىڭدار» دەگەن سياقتى ءوتىنىشى بولعان. بۇل بىزگە اسەر قالدىردى. سەبەبى، ادامدار راسىمەن قيىن جاعدايدا ەدى، - دەدى ول سوتتا.
ونىڭ ايتۋىنشا، قورعا ءىرى كومپانيالار مەن بانكتەردىڭ قوماقتى قارجى اۋدارۋى اتالعان ۇيىمعا دەگەن سەنىمدى ارتتىرعان.
كەشە وتكەن سوت وتىرىسىندا Forte Bank ماركەتينگ ديرەكتورى انتون كيم تاسقىن كەزىندە پەريزات قايراتتىڭ قورىنا جەكە شوتىمنان جارتى ميلليون تەڭگە اۋدارعانىن ايتقان ەدى.
سوت وتىرىسىندا بەلگىلى بولعانداي، پەريزات قايرات اناسىن ورتاعا سالىپ، 23 ميلليون تەڭگەگە گۇل بيزنەسىن ساتىپ العان.
بۇعان دەيىن «اسار- ۇمە» قورىنىڭ پرەزيدەنتى اسحات نۇرماشيەۆ كۇدىكتى پەريزات قايراتقا 200 ميلليون تەڭگە اۋدارعانىن ايتتى.
